सिन्धुली । शनिबार दिउँसो विपी राजमार्गमा हायस दुर्घटना भएको छ । राजमार्ग अन्तर्गत गोलन्जोर गाउँपालिका वडा नं. ५ छब्बिसमा हायस दुर्घटना हुँदा चारजना घाईते भएका छन् ।
मोरङबाट काठमाडौं जाँदै गरेको बा ५ ख ५९८४ नम्बरको हायस ब्रेक फेल भई अनियन्त्रित भएर सडकको नालामा खसेको जिल्ला प्रहरी कार्यालय सिन्धुलीले जनाएको छ ।
प्रहरीका अनुसार हायसमा चालक सहित १४ जना सवार थिए । दुर्घटनामा चार जना घाइते भएका छन् । घाइतेमध्ये धनुषाको गणेशमान नगरपालिका–७ की २२ वर्षीया रुवी साहको टाउको र अनुहारमा चोट लागेको छ । उनको अवस्था गम्भीर रहेको प्रहरीले जनाएको छ ।
त्यस्तै, मोरङ सुन्दरहरैँचा नगरपालिका–१२ का १९ वर्षीय समित भुजेलको शरीरका विभिन्न भागमा चोट लागेको छ । उनको अवस्था पनि गम्भीर रहेको छ । सोही स्थानका २० वर्षीय उज्वल चौधरीको दुवै खुट्टामा चोट लागेको छ भने सुनसरी इटहरी उपमहानगरपालिका–१७ का ४२ वर्षीय दुर्गानन्द शर्माको दुवै हातमा चोट लागेको प्रहरीले जनाएको छ । चौधरी र शर्माको अवस्था सामान्य रहेको छ ।
घाइते चारै जनालाई उपचारका लागि सिन्धुली अस्पतालमा ल्याईएको र उपचार भईरहेको जिल्ला प्रहरी कार्यालय सिन्धुलीका डिएसपी विजय श्रेष्ठले जानकारी दिए ।
दुर्घटनामा परेको हाइस घटनास्थलमै रहेको छ भने चालक उमेश श्रेष्ठलाई प्रहरी चौकी गढीको नियन्त्रणमा राखिएको उनले जानकारी दिए ।
