सिन्धुली । तीन जिल्लाका सुरक्षा प्रमुखहरुको बैठक बुधबार सिन्धुलीको मुलकोटमा सम्पन्न भएको छ । सिन्धुली, रामेछाप र काभ्रेपलाञ्चोकका प्रमुख जिल्ला अधिकारीहरु सहित सुरक्षा प्रमुखहरुको बैठकले निर्वाचन सुरक्षा, शान्ति सुरक्षा तथा अपराधिक गतिविधि नियन्त्रणमा साझेदारी गर्ने निर्णय गरेको छ ।
शान्ति सुरक्षा, अपराध नियन्त्रण, अन्तर जिल्लासँग सम्बन्धित गतिविधि, निर्वाचन सुरक्षा, सडक सुरक्षा, विपद् प्रतिकार्य तथा व्यवस्थापनमा समन्वय र साझेदारी सहित काम गर्ने विषयमा छलफल भएको सहायक प्रमुख जिल्ला अधिकारी दिपेन्द्र पौडेलले बताएका छन् ।
छलफलले शान्ति सुरक्षाको स्थिति एवं सु–व्यवस्था कायम गर्न, अपराध नियन्त्रण गर्न आवश्यक समन्वय गर्ने निर्णय गरेको उनले बताए । बैठकमा आगामी फागुन २१ गते हुन गईरहेको प्रतिनिधिसभा सदस्य निर्वाचनको सुरक्षालाई प्रभावकारी बनाउने विषयमा समेत छलफल केन्द्रीत भएको छ ।
बैठकमा तीन जिल्लाका सिमा क्षेत्रमा संयुक्त सुरक्षाको व्यवस्थापन, सडक सुरक्षा, दुर्घटना न्युनिकरण, अवैध हातहतियारको खोजी तथा नियन्त्रण, फरार कैदीबन्दीहरु नियन्त्रण लगाएतका विषयमा आवश्यक समन्वय, सूचना आदानप्रदान र सुक्ष्म निगरानी गर्ने सवालमा समेत छलफल भएको छ ।
यस्तै बढ्दै गरेको लागु औषध कारोवार र दुव्र्यसन नियन्त्रणका लागि कडाई गर्ने विषयमा समेत बैठकमा छलफल भएको छ । विपद जन्य घटनामा खोज, उद्धार र प्रतिकार्य लगायतमा अन्तर–जिल्ला स्रोत साधनको प्रयोगमा समेत प्रभावकारी समन्वय गर्ने निर्णय भएको पौडेलले बताएका छन् ।
जिल्लाका शान्ति सुरक्षाका वस्तु स्थिति, शान्ति सुरक्षाको अवस्था, आवातजावत तथा ढुवानीको अवस्था, चोरी पैठारीको व्यवस्थापन र विपी राजमार्गको निर्माणमा सहजीकरण गर्ने लगाएतका विषयमा बैठकमा छलफल भएको उनले बताए ।
