सिन्धुली । नेपाली कांग्रेसको १५ औं केन्द्रीय महाधिवेशनको सरगर्मी सिन्धुलीमा पनि बढेको छ । सिन्धुली क्षेत्र नं. १ का लागि सोमबार कमलामाई नगरपालिका ९ भिमानमा मनोनयन दर्ता भएको छ ।
केन्द्रीय महाधिवेशन प्रतिनिधि छनौटका लागि भएको मनोनयन दर्ता सकिएपछि नेपाली कांग्रेसले उमेदवारहरुको नामावली सार्वजनिक गरेको छ । सिन्धुली क्षेत्र नं. १ बाट केन्द्रीय महाधिवेशन प्रतिनिधिमा ३२ जना निर्वाचित हुने छन् ।
बत्तिस जनाका लागि हुने निर्वाचनमा ७१ जनाको उमेदवारी परेको छ । केन्द्रीय महाधिवेशनका लागि खुल्लातर्फ १० जना, खुल्ला युवातर्फ १ जना, खस आर्य तर्फ २ जना, अपांगता १ जना, युवा महिला १ जना, पेशागततर्फ १, श्रमिकतर्फ १ जना, खस आर्य महिलातर्फ १ जना, दलिततर्फ १ जना, समावेशी दलिततर्फ १ जना, अल्पसंख्यक १ जना, प्रजातन्त्र सेनानी शहिद परिवार वा द्वन्द्व प्रभावितबाट १ जना, आदिवासी जनजाती पुरुषतर्फ ३ जना, आदिवासी जनजाती महिलातर्फ ३ जना, खुल्ला महिलातर्फ ४ जना केन्द्रीय महाधिवेशन प्रतिनिधिमा निर्वाचित हुने नेपाली कांग्रेसले जनाएको छ ।
मंगलबार हुने निर्वाचनका लागि खुल्लातर्फ २३ जनाको उमेदवारी परेको छ । खुल्ला महिलातर्फ १० जनाको उमेदवारी परेको छ । युवातर्फ ८ जना, खस आर्यतर्फ २ जना, अपांगतातर्फ २ जना, युवा महिलातर्फ २ जना, पेशागततर्फ २ जना, श्रमिकतर्फ ४ जना, आदिवासी जनजाती पुरुषतर्फ १० जना, आदिवासी जनजाती महिलातर्फ ५ जना, खसआर्य महिलातर्फ २ जना, समावेशीतर्फ १ जनाको उमेदवारी परेको छ ।
