सिन्धुली । जिल्लामा आत्महत्या गर्नेको तथ्यांक अत्यधिक छ । हरेक वर्ष तथ्यांक घट्नुको साटो बढ्दै गएको देखिन्छ । तीन वर्षको तथ्यांकलाई हेर्दा जिल्लामा २ सय ४० जनाले आत्महत्या गरेका छन । आत्महत्या गर्नेमा अत्यधिक झुण्डिएर आत्महत्या गर्ने छन । त्यसपछि विष सेवन गरि आत्महत्या गरेको देखिन्छ ।
जिल्ला प्रहरी कार्यालय सिन्धुलीका अनुसार झुण्डिएर आत्महत्या गर्नेको संख्या २०९ रहेको छ । यस्तै विष सेवन गरेर आत्महत्या गर्नेको संख्या ३१ रहेको छ । आत्महत्या गर्नेमा १० वर्ष मुनीका बालबालिकादेखि ६० वर्ष नाघेका जेष्ठ नागरिक समेत रहेको जिल्ला प्रहरी कार्यालय सिन्धुलीले जनाएको छ ।
जिल्लामा आत्महत्या गर्नेको वार्षिक संख्या हेर्दा आर्थिक वर्ष २०७८/०७९ मा ७१ जनाले आत्महत्या गरेका छन भने आर्थिक वर्ष २०७९/०८० मा ८८ जनाले आत्महत्या गरेका छन । यो दुई वर्षमा आत्महत्याको दर २३ दशमलब ९४ प्रतिशतले वृद्धि भएको देखिन्छ ।
त्यस्तै आर्थिक वर्ष २०८०/०८१ मा आत्महत्या गर्नेको संख्या ८१ रह्यो । अघिल्लो आर्थिक वर्षको तुलनामा आर्थिक वर्ष २०८०/०८१ मा ७ दशमलब ९ प्रतिशतले आत्महत्या गर्नेको संख्या घटेको देखिन्छ । तथापी आत्महत्याको तीन वर्षको तथ्यांकलाई तुलना गर्दा आत्महत्या बढेको पाईन्छ ।
जिल्ला प्रहरी कार्यालय सिन्धुलीका प्रमुख एसपी गोविन्दराज काफ्लेका अनुसार तीन आर्थिक वर्षमा १० वर्ष मुनीका १० जना बालबालिकाले आत्महत्या गरेका छन । आत्महत्या गर्नेमा बालिका ५ जना र बालक ५ जना रहेका छन । यस्तै १० वर्ष माथि १८ वर्ष मुनीका २३ जना बालबालिकाले आत्महत्या रोजेका छन । तीन वर्षमा १० बालक र १३ जना बालिकाले आत्महत्या गरेको प्रहरीको तथ्यांक छ ।
प्रहरीको तथ्यांक अनुसार १८ वर्ष माथिका श्रम गर्न सक्ने उमेरका नागरिकहरुले बढी आत्महत्या रोजेका छन । १८ वर्षदेखि ६० वर्षसम्मका १ सय ८२ जनाले आत्महत्या गरेका छन । जसमा महिला ७९ जना रहेका छन ।
आत्महत्या गर्नेमा जेष्ठ नागरिकहरु समेत रहेका छन । ६० वर्ष माथिका १८ जना पुरुष र ७ जना महिलाले तीन वर्षको अवधिमा आत्महत्या गरेका छन ।
आत्महत्या गर्नुको मुख्य कारण प्रेममा धोका पाउनु देखिएको छ । त्यस्तै दोस्रो कारण घरायसी झै झगडा, तेस्रो कारण ऋण तिर्न नसक्नु र चौथो कारण रोग रहेको पाईएको एसपी काफ्लेले बताए । उनका अनुसार जिल्लामा तीन वर्षमा प्रेममा धोका पाएर ११४ जनाले आत्महत्या गरेका छन । घरायसी झगडाका कारण ७१ जना, ऋण तिर्न नसक्दा वा आर्थिक अभावका कारण ३६ जनाले आत्महत्या गरेका छन । १९ जनाले भने रोगका कारण आत्महत्या गरेको पाईएको छ ।
आत्महत्यालाई पेशागत विश्लेषण गर्दा अत्यधिक व्यक्तिहरु कृषि पेशामा लागेकाहरुले आत्महत्या रोजेका छन । महिला भन्दा बढी पुरुषले आत्महत्या गरेका छन । जिल्लामा तीन वर्षमा महिला १०४ जना र १३६ जना पुरुषले आत्महत्या गरेका छन ।
