सिन्धुली । जिल्ला लैंगिक हिंसाको चरम प्रभावमा छ । अझ त्यसको प्रभाव बालबालिकामा परेको छ । एक तथ्यांकले जिल्लामा बालबालिकाहरु हिंसाको प्रत्यक्ष नकारात्मक प्रभावमा परिरहेका छन । हिंसाबाटै बालबालिकाहरु प्रभावित त छँदैछन, आमाहरु हिंसामा पर्दा बालबालिका हिंसाको अप्रत्यक्ष तर गहिरो प्रभावमा परिरहेको देखिन्छ ।
सुरक्षित आवास गृह सिन्धुलीले हिंसा प्रभावित बालबालिकाको तथ्यांक अध्यावधिक गर्दै आएको छ । गृहमा सेवा लिन आउनेमध्ये ३९ प्रतिशत बालिका हिंसा प्रभावित भएको जनाएको छ । सुरक्षित आवास गृहको आर्थिक वर्ष २०८१÷०८२ को तथ्यांक अनुसार जिल्लामा ८७ जना नयाँ सेवाग्राहीले सेवा लिएकोमा ३४ जना बालबालिका रहेका छन । जो प्रत्यक्ष हिंसा प्रभावित छन ।
यस्तै आवास गृहमा आउने हिंसा प्रभावितहरुमध्ये २२ जना आमासँगै आवास गृहमा आएका छन । उनीहरु आमा प्रभावित हुँदा आश्रित बालबालिका भएकै कारण संरक्षण नभएर आवास गृहमा आएका छन । यो तथ्यांकले हिंसा प्रभावित महिलाहरुमध्ये ४१ प्रतिशतले बालबालिका लिएरै सुरक्षित आवासमा आएको प्रस्ट गर्छ ।
सुरक्षित आवास गृह सिन्धुलीका प्रमुख गिता देवकोटाका अनुसार एक वर्षमा आवासगृहमा आएका ५३ जना महिलामध्ये ४१ प्रतिशतले बालबालिका लिएर आएका छन ।
जिल्लामा विगत वर्षमा पनि आमासँगै हिंसामा पर्ने र संरक्षकत्व समेत नपाएर सुरक्षित आवास गृह (सेफ हाउस) मा बस्न आउने बालबालिकाको संख्या निक्कै ठूलो छ । त्यति मात्र हैन हिंसाबाट प्रत्यक्ष प्रभावित बालबालिकाको संख्या पनि उल्लेख्य छ ।
सन् २०१७ देखि सन् २०२५ जुलाईसम्म प्रत्यक्ष हिंसामा परेर आएका बालबालिकाको संख्या २ सय ६८ जना रहेको सेफ हाउसको तथ्यांक छ । यो अवधिमा जिल्लामा आमासँगै लैंगिक हिंसामा परेका बालबालिकाहरुको संख्या पनि अत्यधिक धेरै रहेको पाईएको छ । सन् २०१७ देखि हालसम्म १ सय ७९ जना बालबालिका आमासँगै सुरक्षित आवासमा आश्रय लिएको देखिएको छ ।
देवकोटाका अनुसार ती बालबालिकाहरु आमासँगै प्रत्यक्ष अप्रत्यक्ष हिंसामा परेका छन । ‘उनीहरु आमा बिना असुरक्षित छन र असुरक्षित आमासँगै सुरक्षा चाहिरहेका छन,’ देवकोटाले भनिन ।
हिंसा प्रभावित बालबालिकाको पठनपाठनमा समेत असर परेको छ । हिंसाका कारण बीचैमा पढाई छोड्नुपर्दा उनीहरुको भविष्य समेत अन्यौलमा परेको उनले बताएकी छिन ।
बलत्कार पीडितबाट जन्मेका बालबालिकाको व्यवस्थापन झनै चुनौतीपूर्ण रहेको देवकोटाले बताएकी छिन । देवकोटाले लैंगिक हिंसामा प्रभावितहरुको पुनःस्र्थापना चुनौती बनेको बताएकी छिन ।
आफन्तबाट हिंसामा प्रभावित बनेकाहरुको पुनस्र्थापना झनै चुनौतीपूर्ण रहेको उनले बताईन । एक वर्षमा उक्त सुरक्षा हाउसमा लैंगिक हिंसामा परेर पुनस्र्थापना गरेका २९ जना सेवाग्राही पुनः गृहमा आश्रय लिन आएको पनि उनले जानकारी दिएकी छिन ।
