सिन्धुली । नेपाली कांग्रेसको १५औँ महाधिवेशनको सरगर्मीले सिन्धुली पनि तातिएको छ । सोहि अनुरुप सोमबार सिन्धुली क्षेत्र नं. १ र २ अन्तर्गतका मनोनयन दर्ता गरिएको छ । यस्तै प्रदेश महाधिवेशन प्रतिनिधि र केन्द्रीय महाधिवेशन प्रतिनिधिहरुको समेत मनोनयन दर्ता भएको छ ।
सोमबार प्रतिनिधिसभा क्षेत्र नं. १ को पनि उमेदवारी दर्ता भएको छ । नेपाली कांग्रेसको क्षेत्र नं. १ को क्षेत्रीय कार्य समितिको सभापतिका लागि तीन जनाले उम्मेदवारी दर्ता गराएका छन् ।
सार्वजनिक गरिएको उमेदवारको नामावली अनुसार सभापतिमा चन्द्रदीप कोईराला, बलराम कार्की र सुजन बहादुर थापा मगरले उमेदवारी दिएका छन् । यस्तै सचिवमा खुपेन्द्र राजभण्डारी, दौलत कार्की र पूर्णराज गिरीको उमेदवारी रहेको छ ।
त्यस्तै सहसचिवमा दुई जनाको दावी रहेको छ । सार्वजनिक नामावली अनुसार सहसचिवमा अविनाश अधिकारी र यन्त्रराज अधिकारीको उमेदवारी रहेको छ ।
क्षेत्रीय कार्यसमितिमा १२ जना सदस्यहरु निर्विरोध निर्वाचित भएका छन् । निर्विरोध निर्वाचित हुनेमा खुला सदस्यतर्फ इन्द्रबहादुर कार्की, सुकदेव अधिकारी, ताराबहादुर सुनुवार, चेतप्रसाद भट्टराई र कमलप्रसाद दाहाल निर्विरोध चयन भएका छन्। युवा सदस्यमा सुदर्शन बस्नेत पनि निर्विरोध निर्वाचित भएका छन् ।
दलित सदस्यमा मिनबहादुर वि.क., आदिवासी–जनजाति सदस्यमा राजबहादुर श्रेष्ठ र जीतलाल अधिकारी, आदिवासी–जनजाति महिला सदस्यमा पुनम अधिकारी, खस–आर्य महिला सदस्यमा कल्पना खतिवडा निर्विरोध निर्वाचित भएका छन् । नामावलीमा महिला सदस्य, महिला युवा सदस्य र खुला महिला सदस्य पदमा भने कुनै उमेदवारी परेको छैन ।
