सिन्धुली । सुनकोशी र रोशी खोलामा आएको बाढीका कारण पीडित भएकाहरुलाई बुधबारदेखि राहत वितरण गर्न सुरु गरिएको छ । गोलञ्जोर गाउँपालिकाको खुर्कोट, बलेनी, मुर्किवेशी लगाएतका स्थानका राहत वितरण गरिएको राहत वितरण कार्यदलका संयोजक कृष्णमणी फुयाँलले बताए । बुधबार पहिलो चरणमा खुर्कोटका ६४ परिवार, र बलेनी, मुर्किवेशीका २१ परिवारलाई खाद्य तथा गैह्र खाद्य राहत वितरण गरिएको हो ।
नेपाल रेडक्रस सोसाईटी सिन्धुलीले कार्यदललाई उपलब्ध गराएको गैह्र खाद्य सामग्री, प्लान नेपाल र वल्र्डभिजनले उपलब्ध गराएको खाद्य तथा गैह्र खाद्य सामग्री राहत वितरण गरिएको उनले बताए ।
वल्र्ड भिजनको सहयोगमा रिलिफ नेपाल मार्फत खाद्य सामग्रीहरु प्रति परिवार २५ केजी चामल, ३ केजी दाल, १ केजी नुन, २ लिटर तेल, १ किलो चिनी राहत वितरण गरिएको छ । यस्तै प्लान नेपालको सहयोगमा जनजाति विकास कार्यक्रम र ह्याण्ड्स नेपालले १ सेट हाईजिङ किट, १ वटा झुल, १ वटा म्याट, १ वटा त्रिपाल, १ वटा कम्बल लगाएतका सामग्री वितरण गरिएको छ ।
यस्तै रेडक्रस सोसाईटी सिन्धुलीले उपलब्ध गराएको राहत प्याकेज त्रिपाल १ थान, व्याङ्केट २ वटा, १ सेट भाँडाकुँडा, एक वटा म्याट, १ वटा डोरी, १ वटा मग, एक वटा बाल्टिन, पाँचजनाको परिवारलाई पुग्ने एक एक सेट लगाउने लुगा सहितको प्याकेज समेत सो अवसरमा बाँडिएको छ ।
सबै परिवारले तीन खालकै सेट राहत स्वरुप पाएको संयोजक फुयाँलले बताए । उनका अनुसार जिल्ला विपद व्यवस्थापन समितिले राहत वितरणका लागि सहायक प्रमुख जिल्ला अधिकारीको संयोजकत्वमा गठित राहत वितरण कार्यदल मार्फत राहत वितरण गरिएको छ ।
गोलञ्जोरबाट प्राप्त पूर्ण घरबास क्षति भएका परिवारलाई पहिलो चरणमा राहत वितरण गरिएको हो । सुनकोशी गाउँपालिकाको क्षतिको विवरण आईसकेको छैन । क्षतिको विवरण विहिबारसम्म आईपुग्ने र विवरण प्राप्त भएपछि राहत वितरण गरिने फुयाँलले जानकारी दिए ।
यस्तै बागमती नदीमा आएको बाढीका कारण घरबास क्षति भएका ७ परिवारलाई विहिबार राहत वितरण गरिने भएको छ । उनीहरुलाई पनि खाद्य तथा गैह्र खाद्य सामग्री भएको राहत प्याकेज वितरण गरिने उनले बताए ।
राहत वितरणमा स्थानीय पालिका प्रतिनिधि, प्रहरी प्रतिनिधि, राहत सहयोग गर्ने दाताहरु, पत्रकार लगाएतको उपस्थिति रहने उनले बताए । राहत वितरण विपदमा भरोसा मात्र रहेको र सरकारको उपस्थिति मात्र रहेको पनि उनले बताएका छन ।
