सिन्धुली । दुधौली नगरपालिकामा बुधबार ७५ जनाको थ्रोट स्वाव संकलन गरिएको छ । दुधौली नगरपालिका र जिल्ला स्वास्थ्य कार्यालय सिन्धुलीको समन्वयमा थ्रोट स्वाव संकलन गरिएको हो । दुधौली नगरपालिकाले भिटिएम किट्स खरिद गरेपछि त्यहाँका क्वारेन्टाईनमा रहेका व्यक्तिहरुको स्वाव संकलन गरिएको स्वास्थ्य कार्यालय सिन्धुलीका प्रमुख जितेन्द्रकुमार शाहले बताए ।
उनका अनुसार दुधौली नगरपालिका वडा नं. २ भलुवाहिमा रहेको क्वारेन्टाईनका १४ जना, दुधौली नगरपालिका वडा नं. ९ मा रहेका ५० जना र कोरोना रोकथामका लागि अग्रपंक्तिमा रहेर काम गरिरहेका अन्य गरि ७५ जनाको स्वाव संकलन गरिएको हो । उक्त नमुना विहिबार परिक्षणका लागि प्रादेशिक अस्पताल हेटौडामा पठाईने शाहले बताएका छन ।
दुधौली नगरपालिकाका केहि जनप्रतिनिधिहरु, क्वारेन्टाईन व्यवस्थापन र स्वास्थ्य उपचारमा खटिएका र आशंका लागेका व्यक्तिहरुको समेत स्वाव संकलन गरिएको दुधौली नगरपालिकाले जनाएको छ ।
दुधौली नगरपालिकाले २ सय भिटिएम किट्स खरिद गरि स्वास्थ्य कार्यालय सिन्धुलीको समन्वयमा स्वाव संकलन गर्न सुरु गरेको नगरपालिकाका प्रवक्ता रितेस राउतले बताएका छन । स्वास्थ्य कार्यालयमा किट्सको अभाव भएपछि स्थानीय तहले आफै किट्स खरिद गरि कोरोना परिक्षणका लागि नमुना संकलन सुरु गरेका हुन । यसअघि कमलामाई नगरपालिकाले पनि २ सय भिटिएम किट्स खरिद गरि स्वाव संकलन गरिरहेको छ ।
