सिन्धुली । सिन्धुलीमा हालसम्म ३ सय ६० जनाको स्वाव परिक्षणका लागि नमुना संकलन गरिएको छ । जिल्लामा पिसिआर परिक्षणको ल्याव नभएपछि संकलन गरिएका नमुना प्रादेशिक प्रयोगशाला हेटौडा, धुलिखेल अस्पताल तथा राष्ट्रिय जनस्वास्थ्य प्रयोगशाला टेकुमा पठाएर परिक्षण गरिएको छ ।
परिक्षणका लागि पठाईएका नमुना मध्ये ३ सय ३८ जनाको परिक्षण रिपोर्ट आएको छ भने ४२ जनाको रिपोर्ट आउन बाँकी रहेको छ । परिक्षण गरिएका मध्ये ३ जनाको रिपोर्ट पोजेटिभ आएको छ भने ३ सय ३४ जनाको रिपोर्ट नेगेटिभ आएको छ । संक्रमित ३ जनाको स्वास्थ्य अवस्था सामान्य रहेको छ । उनीहरुको सिन्धुली अस्पतालको आइसोलेसनमा उपचार भईरहेको छ ।
रिपोर्ट आउन बाँकी रहेका मध्ये ४१ जना कमलामाई नगरपालिका सिन्धुलीको क्वारेन्टाईनमा रहेका र सिन्धुली अस्पतालमा परिक्षणका लागि आएका शंकास्पद व्यक्तिको नमुना रहेको स्वास्थ्य कार्यालय सिन्धुलीका प्रमुख जितेन्द्र कुमार शाहले बताए । उनका अनुसार १ जना हरिहरपुरगढीको बाग्मतिमा केहि दिन अघि शव भेटिएका बौद्ध धर्म गुरु लामाको स्वाव रहेको छ । उनको स्वाव संकलन गरि पठाएको ५ दिनसम्म पनि रिपोर्ट आएको छैन । गुम्बामा पुजा आजाको लागि आएका मकवानपुरका लामाको शव शंकास्पद भेटिए पछि उनको स्वाव परिक्षणका लागि पठाईएको थियो ।
यस्तै जिल्लामा हालसम्म आरडिटी परिक्षण विधिबाट १ हजार १ सय ४० जनाको स्वास्थ्य परिक्षण गरिएको छ । परिक्षण गरिएका मध्ये ३३ जनाको आरडिटी रिपोर्ट पोजेटिभ आएको थियो । ती सबैको पिसिआर रिपोर्ट भने नेगेटिभ आएको छ ।
स्वास्थ्य कार्यालय सिन्धुलीका प्रमुख शाहका अनुसार स्थानीय तहहरुले तयार गरेका क्वारेन्टाईनमा ८९ जना व्यक्तिहरु रहेका छन भने होम क्वारेन्टाईन १ सय ४० जना रहेका छन । जिल्लामा हालसम्म तयारी अवस्थामा रहेका क्वारेन्टाईन वेड संख्या ३ सय ९८ रहेका छन ।
