सिन्धुली । सिन्धुली उद्योण वाणिज्य संघले सरकारले पहिलो चरणमा लकडाउनलाई खुकुलो पार्दै खोल्ने निर्णय गरेका पसलहरु बिहान ७ बजेदेखि साँझ ७ बजेसम्म खुल्ने जनाएको छ ।
संघको आधिकारिक फेसबुकमा सूचना जारी गर्दै संघका अध्यक्ष अमरेश चन्द्र बैदारले उक्त सूचना जारी गरेका हुन । सिन्धुली उद्योग वाणिज्य संघ सिन्धुली सहित जिल्ला प्रशासन कार्यालयमा बसेको बैठकले उचित स्वास्थ्य सुरक्षा अपनाई व्यवसाय खोल्ने निर्णय गरेपछि संघले व्यवसायीहरुलाई सूचना जारी गर्दै १२ घण्टा पसल खोल्न अनुरोध गरेको हो ।
लकडाउन खुकुलो पार्ने गरि सरकारले बुधबार गरेको निर्णयलाई कार्यान्वयन गर्न प्रमुख जिल्ला अधिकारी योगेन्द्र प्रसाद पाण्डेको अध्यक्षतामा शुक्रबार बसेको बैठकले उचित स्वास्थ्य सुरक्षा कायम गर्दै सेवा प्रदान गर्ने निकायले २ मिटरको सामाजिक दुरी कायम गर्ने, मास्कको प्रयोग गर्ने, पटक पटक साबुन पानीले हात धुने वा स्यानीटाइजरको प्रयोग गर्ने लगायत जनस्वास्थ्यका मापदण्ड र सुरक्षाका मापदण्ड पालना गर्ने गरी सेवा सूचारु गर्ने निर्णय गरेको थियो ।
उक्त निर्णयलाई आधार बनाई संघले स्वास्थ्य सुरक्षा अपनाई पसल खोल्न अनुरोध समेत गरेको छ । यो निर्णय नभए पनि सिन्धुलीमा करिब एक सातादेखि सबै पसल तथा व्यवसायहरु निर्वाध रुपमा सञ्चालन भईरहेका थिए ।
