सिन्धुली । कमलामाई नगरपालिकाको मिनी चुनावका रुपमा हेरिएको सिद्धेश्वर खानेपानी तथा सरसफाई उपभोक्ता संस्थाको निर्वाचनमा शनिबार मतदान चलिरहेको छ । पुस ३० गते साधारणसभा सम्पन्न गरेको संस्थाको निर्वाचन पेचिलो बनेको छ । कमलामाई नगरपालिकाको नगर निर्वाचन जत्तिकै दलीय रुपमा पेचिलो बनेको उक्त चुनावमा अध्यक्षमा ३ जनाको प्रतिस्पर्धा छ ।
दुई साझा गठबन्धनसहित स्वतन्त्र प्यानलको समेत कडा प्रतिस्पर्धा हुने देखिएको निर्वाचनमा शनिबार विहान ८ बजेदेखि उपभोक्ताहरु मतदानको लागि लाईनमा छन ।
१ बजेसम्म एक हजार मत खसिसकेको सिद्धेश्वर खानेपानी उपभोक्ता संस्थाको निर्वाचन समितिले जनाएको छ । निर्वाचन साँझ ५ बजेसम्म चल्ने छ । मतगणना आइतबार गरिने भएको छ ।
अध्यक्ष १, खुला सदस्य ५ र महिला सदस्य ३ गरि ९ जनाको कार्यसमिति चयनका लागि मतदान भईरहेको छ । अध्यक्षमा नेकपा एमाले र राप्रपाका साझा उमेदवार घनश्याम देवकोटा, नेपाली कांग्रेस र नेकपा माओवादी केन्द्रका साझा उमेदवार सुरज मिश्र (शेखर) र स्वतन्त्र रुपमा उमेदवारी दिएका नेपाली कांग्रेसबाट कमलामाई नगरपालिका वडा नं. ६ मा निर्वाचित भएका पूर्व वडा सदस्य लोकविक्रम थापा चुनावी मैदानमा छन । लोकविक्रम थापालाई कांग्रेसको आधा नेतृत्वको सहयोग छ ।
अध्यक्षमा ३ जनाको नै कडा प्रतिस्पर्धा हुने आँकलन गरिएको छ । यस्तै खुला सदस्यका लागि १६ जना प्रतिस्पर्धामा छन भने महिला सदस्यका लागि ६ जना प्रतिस्पर्धामा छन ।
तीन हजार ४ सय २६ सदस्य रहेको खानेपानीमा २ हजार ८ सय ९३ जनाले मतदान गर्न पाउने छन । उक्त निर्वाचनमा सदरमुकाम सिन्धुलीमाढी भित्रका ४, ५, ६ र ७ नं. वडाका उपभोक्ताले मतदान गर्नेछन । खानेपानीको तीन महिनाभन्दा बढी समयको खानेपानी महसुल नबुझाएका उपभोक्ताले भने मतदान गर्न पाएका छैनन ।
५ सय ३३ जना सदस्यले पटक पटक ताकेता गर्दा समेत बक्यौता रकम नतिरेका कारण मतदानबाट बञ्चित भएका छन । संस्थाले तीन महिनाभन्दा बढी बक्यौता रकम तिर्न बाँकी रहेका व्यक्तिलाई चुन्ने चुनिने अधिकार नदिने निर्णय गरेको थियो ।
