सिन्धुली । विपी राजमार्गका होटल तथा रेस्टुरेन्टहरुको अनुगमन गर्ने क्रममा विहिबार चियावारी र त्यसका आसपासका क्षेत्रका होटलहरुको अनुगमन गरिएको छ । खाद्य प्रविधि तथा गुण नियन्त्रण डिभिजन कार्यालय, सिन्धुलीले बीपी राजमार्ग अन्तर्गत सिन्धुलीको चियावारी क्षेत्रमा रहेका होटल तथा रेष्टुरेन्टहरूको अनुगमन गरेको हो ।
जिल्ला अनुगमन समितिको संयोजनमा कमलामाई नगरपालिका २, ४ र ६ (चियावारी) आसपासका होटल तथा रेष्टुरेन्टमा स्थलगत अनुगमन गरिएको खाद्य प्रविधि तथा गुण नियन्त्रण डिभिजन कार्यालय सिन्धुलीले जनाएको छ । अनुगमनका क्रममा म्याद नाघेका सामग्री बिक्री वितरण गरेको र खाद्य स्वच्छता कायम नगरेका तीन वटा होटललाई कारवाहि गरिएको छ ।
खाद्य स्वच्छता सम्बन्धी मापदण्ड पालना नगरेको पाइएपछि होटल गाउँलेलाई २० हजार रुपैंया, ए वान लोकप्रिय होटललाई ५ हजार रुपैंया र रेड चिल्ली क्याफेलाई १० हजार रुपैंया जरिवाना गरिएको कार्यालयका खाद्य निरिक्षक एवम् सूचना अधिकारी अतिश घिमिरेले बताएका छन् ।
अनुगमनका क्रममा होटल गाउँलेबाट ६ हजार ३ सय ९० रुपैंया र ए वान लोकप्रिय होटलबाट ४ सय रुपैंया बराबरका म्याद गुज्रेका खाद्यवस्तु फेला पारि नष्ट गरिएको छ ।
अनुगमन गरिएका होटल तथा रेष्टुरेन्टलाई भान्साको सरसफाइमा विशेष ध्यान दिन, खाना पकाउँदा एप्रोन, मास्क र हेडनेट अनिवार्य प्रयोग गर्न, पाकेका खानेकुरा छोपेर राख्न, शाकाहारी र मांसाहारी खाद्यवस्तु छुट्टाछुट्टै भण्डारण गर्न तथा भान्सामा धुवाँ र बाफ बाहिर निकाल्ने एग्जस्ट पंखाको व्यवस्था गर्ने लगायत १६ बुँदे निर्देशन दिइएको छ ।
बीपी राजमार्गमा यात्रा गर्ने यात्रु तथा स्थानीय उपभोक्ताले स्वच्छ र सुरक्षित खाना प्राप्त गर्न सकून् भन्ने उद्देश्यले होटल तथा रेष्टुरेन्टमा खाद्य स्वच्छताको नियमित पालना आवश्यक रहेको कार्यालयले जनाएको छ । होटल सञ्चालकले खाद्यवस्तुको म्याद, भण्डारण, भान्साको सरसफाइ र व्यक्तिगत स्वच्छतामा विशेष ध्यान दिनुपर्ने अनुगमनका क्रममा देखिएको घिमिरेले बताए ।
खाद्य प्रविधि तथा गुण नियन्त्रण डिभिजन कार्यालय, सिन्धुलीले खाद्य स्वच्छता तथा गुणस्तरसम्बन्धी मापदण्ड पालना गर्न व्यवसायीलाई आग्रह गर्दै बजार अनुगमनलाई निरन्तरता दिने जनाएको छ ।
