सिन्धुली । नेपाल सरकारका पूर्व संस्कृति, पर्यटन तथा नागरिक उड्यन मन्त्री एवम नेकपा एमालेका नेता कृपासुर शेर्पा सवार कार मदनभण्डारी राजमार्ग अन्तर्गत सिन्धुलीको चन्दनपुरमा दुर्घटना भएको छ ।
आदीवासी जनजाती महासंघको प्रदेश १ को विस्तारित बैठकमा जाने क्रममा शेर्पा सवार वा२च९००३ नम्बरको टोयोटा कम्पनीको पँजेरो अनियन्त्रित भई जिल्लाको कमलामाई नगरपालिका १४ चन्दनपुरमा दुर्घटना भएको हो । गाडी तिव्र गतिका कारण दुर्घटना भएको जिल्ला प्रहरी कार्यालय सिन्धुलीका डिएसपी मनोज कुमार लामाले जानकारी दिए ।
दुर्घटनामा परि कारमा सवार पूर्वमन्त्री शेर्पा सहित चार जना घाईते भएका छन । घाइते हुनेमा आदीवासी जनजाती महासंघका केन्द्रीय महासचिव पेम्बा गुरुङ, केन्द्रीय उपमहासचिव देवराज राई र नेकपा एमालेका पोलिटव्युरो सदस्य गणेश थापा रहेका छन ।
घाइते चारै जनालाई सिन्धुली अस्पतालमा उपचार गरिएको छ । पूर्व मन्त्री शेर्पा लगाएत सबै घाइतेको अवस्था सामान्य रहेको सिन्धुली अस्पतालले जनाएको छ । उनीहरुलाई उपचार पछि डिस्चार्ज समेत गरिएको छ ।
दुर्घटनापछि चालक पेम्वा शेर्पालाई प्रहरीले नियन्त्रणमा लिएको थियो ।
