सिन्धुली । कमलामाई नगरपालिकाले आर्थिक बर्ष २०७९÷८० का लागि १ अर्ब ३४ करोड ७६ हजार बजेट बिनियोजन गरेको छ । शुक्रबार कमलामाई नगरपालिकाको ११ औं नगरसभामा नगरपालिकाका उपप्रमुख मन्जु देवकोटाले उक्त बजेट प्रस्तुत गरिन ।
उनले विभिन्न शिर्षकको बजेट विनियोजन गर्दा ऐतिहासिक सिन्धुलीगढीको विकासका लागि समेत बजेट विनियोजन गरेको छ । जसका लागि नगरपालिकाले एक करोड बजेट विनियोजन गरेको हो । नगरको विभिन्न वडागत विकासात्मक आयोजना तथा कार्यक्रमहरुका लागि १५ करोड, नगरपालिकाको प्रकोप व्यवस्थापन कोषको लागि ५० लाख बजेट विनियोजन गरिएको छ ।
नगरपालिकाले सडक वोर्ड लगायत विभिन्न संस्थासँग गरिने लागत साझेदारीका लागि ६० लाख विनियोजन गरेको छ । नगरपालिकाको संचालन तथा प्रशासनिक कार्यको लागि २३ करोड ६४ लाख बजेट विनियोजन गरिएको छ ।
माध्यमिक तहसम्मको शिक्षाको गुणस्तर अभिवृद्धी गर्दै सम्पूर्ण शैक्षिक गतिविधिलाई प्रभावकारी र परिणाममुखी बनाउन नगरपालिकाले आफूले विनियोजन गर्ने बजेटबाट रु. ४ करोड ५० लाख विनियोजन गरिएको हो ।
त्यस्तै नगर क्षेत्रभित्र कृषिको उत्पादन अभिवृद्धी गर्न विभिन्न क्रियाकलापहरु संचालनका लागि आफूले विनियोजन गर्ने बजेटबाट रु. १ करोड ,भौगोलिक रुपमा विविधतापूर्ण रहेको कमलामाई नगरक्षेत्रभित्र विभिन्न पशुपालन व्यावसाय रहेका छन् । यीनिहरुको उत्पादन क्षमता र नश्लिय सुधारका कार्यक्रमहरु र पशुपालक किसानहरुलाई प्रोत्साहन गर्ने कार्यक्रमहरु संचालन गर्न १ करोड १० लाख विनियोजन गरिएको छ ।
स्वास्थ्य क्षेत्रको विकासका लागि नगरपालिकाले ८० लाख, फोहोर मैला व्यवस्थापन र वातावरण संरक्षणमा ५० लाख, व्यवस्थित शहरीकरणका लागि भवन र वस्ती विकासका कार्यक्रम सञ्चालन गर्न १० लाख, नगर क्षेत्रभित्र व्यापार व्यवसाय र उद्योगहरुको स्थापना, प्रवर्दन गर्नका लागि ९ लाख रुपैंया विनियोजन गरिएको छ ।
विभिन्न पछाडि परेका एवं पारिएका जाति, वर्ग, लिंङ्ग एव त्यस प्रकारका लक्षित व्यक्ति एवं समुहलाई मुलधारमा ल्याई विकास गर्ने कार्यका लागि लक्षित वर्ग तथा महिला सशक्तिकरणको कार्यक्रमका लागि ३० लाख बजेट विनियोजन गरिएको छ । यस्तै न्यायीक समितिका लागि १५ लाख रुपैंया बजेट विनियोजन गरिएको छ ।
यस्तै सहकारीका लागि ९ लाख, नगरपालिकाको आयलाई बढोत्तरी एवं सुद्धिढीकरण गर्ने विभिन्न राजश्व सम्बन्धी कार्यहरुका लागि. ७ लाख र नगपालिकाको वित्तीय अनुशासन सम्बन्धी अभिमुखीकरण, लेखा अनुगमन, नगरको नीति, कार्यक्रम र बजेट सम्बन्धी किताव प्रकाशन लगायत विभिन्न वित्तीय तालिम कार्यक्रमहरु संचालनका लागि ७ लाख बजेट विनियोजन गरिएको छ ।
यसैगरी नगरपालिकाले योजना तथा पूर्वाधारको सम्बन्धमा गर्नुपर्ने आवश्यकीय चालु कार्यको लागि १० लाख, सामाजिक सुरक्षा भत्ता र पञ्जिकरण कार्यलाई व्यवस्थित गर्न ११ लाख विनियोजन गरिएको छ ।
यस्तै नगरपालिकाको सूचना र प्रविधिको विकासको लागि नगरपालिकाले ४३ लाख विनियोजन गरेको छ ।
नगरपालिकाको प्रशासनलाई सुद्धिढीकरणका लागि ४ लाख, आन्तरिक लेखा परीक्षणका सम्बन्धमा अभिमुखीकरण, अनुगमन लगायतका कार्यक्रमहरुका लागि ४ लाख, प्रधानमन्त्री रोजगार कार्यक्रमलाई थप व्यवस्थित र परिणाममुखी बनाउन १५ लाख रकम विनियोजन भएको देवकोटाले बताईन ।
संघीय सरकारबाट विभिन्न आयोजनाहरुका लागि विशेष अनुदान स्वरुप प्राप्त ३ करोड ५० लाख सम्बन्धित आयोजनामा खर्च हुने गरी विनियोजन गरिएको देवकोटाले जानकारी दिईन ।
नगरपालिकाले संघीय सरकारबाट प्राप्त सर्शत अनुदान ५० करोड ९२ लाख, प्रदेश सरकारबाट प्राप्त सशर्त अनुदान २ करोड ६२ लाख ७६ हजार तोकिएको क्षेत्र र शीर्षकमा खर्च गर्ने गरी विनियोजन गरेको छ ।
नगरपालिकाले निर्माण गरिरहेको सीटी हलका लागि नगर विकास कोषको ऋण सहित ८ करोड ३३ लाख विनियोजन गरिएको छ । पेशा, व्यावसाय गर्न चाहने युवाहरुलाई विना धितो, विना व्याजको ऋण कार्यक्रमलाई निरन्तरता दिदै नगर युवा स्वरोजगार कार्यक्रमलाई निरन्तरता दिदैं १ करोड बजेट विनियोजन गरेको छ ।
विकास निर्माण कार्यलाई व्यवस्थित रुपमा लैजान गर्नुपर्ने पूँजिगत अनुसन्धानको कार्यलाई ८० लाख, नगरक्षेत्रको शान्ति, सुरक्षालाई ध्यान दिदै नगरका विभिन्न क्षेत्रमा सोलार सिस्टम र सीसी क्यामरा जडानका लागि ६० लाख, नगरका विभिन्न फुटकर योजनाहरुको लागि २ करोड र नीति तथा कार्यक्रम अनुसारका प्राथामिकताका कार्यक्रमहरुका लागि २ करोड रकम विनियोजन गरेको नगरपालिकाले जनाएको छ ।
नगर क्षेत्रमा भलिवल, फुटवल, क्रिकेट, व्याडमिन्टन लगायतका विभिन्न खेलहरुको विकास, वडाहरुलाई प्रतिस्पर्धात्मक खेलकुदमा सहभागीता अभिवृद्धी गर्न ३५ लाख बजेट विनियोजन गरिएको छ ।
नगर क्षेत्रभित्र रहेको ऐलानी तथा अव्यवस्थित जग्गाको अभिलेखीकरण र भूमिहिन एवं सुकुम्बासीलाई जग्गा धनी पुर्जा वितरण सम्बन्धी विभिन्न कार्यक्रमहरुका लागि २५ लाख रकम छुट्टाईएको छ ।
यस्तै नगरपालिकाले आफु मातहतमा नियुक्त भएका कर्मचारीको तलबमान समेत बढाएको छ । नगरपालिका मातहतका कर्मचारी, शिक्षक र नगर प्रहरीको तलब १५ प्रतिशत वृद्धि गरिएको हो ।
