सिन्धुली । नेकपा माओवादी केन्द्रको आधार इलाका मानिएको मरिण गाउँपालिकामा स्थानीय नेता कार्यकर्ताले सामुहिक विद्रोह गरेका छन । नेतृत्वको मनोमानीका विरुद्ध ७८ जनाले सामुहिक राजिनामा दिएका हुन ।
जिल्ला पार्टी नेतृत्व गुट प्रवृतिमा रम्ने र इमान्दार कार्यकर्तालाई पूर्वाग्रहि व्यवहार गर्ने, तल्ला कमिटीलाई अनिर्णयको बन्दी बनाउने लगाएका काम भएकाले सामुहिक राजिनामा दिईएको राजिनामामा उल्लेख गरिएको छ ।
पार्टी नेतृत्व जनभावना विपरित एकलौटी ढंगबाट अगाडि बढेको भन्दै माओवादी केन्द्रका नेता तथा कार्यकर्ताले राजिनामा दिएको जनाएका छन । यसअघि केन्द्रका मरिण गाउँपालिका अध्यक्ष गोपाल बुढाथोकीले पार्टी परित्याग गरेको घोषणा गरेका थिए । शुक्रबार पार्टी उपाध्यक्ष चिनध्वज बम्जन सहित पालिका स्तरका सक्रिय नेता कार्यकर्ताले माओवादी परित्याग गरेका छन ।
जिल्ला इन्चार्ज राजन दाहालले आफ्नो निर्वाचन क्षेत्र र श्रीमती दीपा बोहोराको गाउँपालिका अध्यक्ष पद सुरक्षित गर्नका लागि कार्यकर्ताको भावना विपरित कांग्रेससँग सिट भागबन्डा गरेको आरोप उनीहरुले लगाएका छन ।
गाउँपालिका अध्यक्ष पानीराज बम्जनको कार्यकक्षमा भएको भेलाबाट उनीहरुले सामूहिक राजिनामा गरेका हुन् । गाउँपालिका अध्यक्ष गोपाल बुढाथोकीले बिहीबार नै राजीनामा दिइसकेका थिए भने बाँकी पदाधिकारीहरुले शुक्रबार राजीनामा दिएका हुन् ।
राजिनामा पत्रमा जिल्ला नेतृत्वको आलोचना गर्दै नेतृत्वको चरित्र सच्चिएमा मात्रै पार्टीमा फर्किन सक्ने उल्लेख छ । राजन दाहालको ‘म’ प्रवृत्तिविरुद्ध आधार इलाका मरिणबाट विद्रोह भएको नेताहरुले बताएका छन् । नेतृत्वको गलत प्रवृत्तिका कारण चैत्र महिनादेखि नै माओवादी छाड्नेको लहर चलिरहेको थियो । वडा नं ६ का शम्भु कार्की माओवादी छाडेर एमालेको अध्यक्षका उम्मेदवार बनेका छन् । वडा नं ७ का खिलहरि गिरीले पनि माओवादी त्यागेका छन् ।
गाउँपालिका कमिटी उपाध्यक्ष चिनध्वज बम्जनको नेतृत्वमा ७८ जनाले लिखित र अन्य दर्जनौंले अलिखित रुपमा माओवादी परित्याग गरेको घोषणा गरेका छन् । पार्टी परित्यागको घोषणा नगरेका मरिण गाउँपालिका वर्तमान अध्यक्ष पानीराज बम्जन, अध्यक्षका प्रत्यासी तथा भूमि आयोगका अध्यक्ष रामकुमार पौडेल लगायतका नेताहरु राजीनामा घोषणा कार्यक्रममा सहभागी थिए ।
यो राजीनामापछि माओवादी मरिण गाउँपालिका कमिटीमा अध्यक्ष, उपाध्यक्ष, सचिव, सचिवालय सदस्य लगायत धेरै वडा कमिटीका पदाधिकारी, जनवर्गिय संगठनको नेतृत्व खाली भएको छ ।
माओवादीको सबैभन्दा बलियो क्षेत्रका रुपमा रहेको यो पालिकामा पार्टी जिल्ला इन्चार्ज राजन दाहालका निकटस्थ मानिएका विमर्श मोक्तानलाई स्थानीय तहको निर्वाचनमा पालिका अध्यक्षको उमेदवार बनाइएको थियो ।
पालिकामा माओवादी केन्द्रका पालिका कमिटी अध्यक्ष गणेश बुढाथोकी, वर्तमान पालिका अध्यक्ष पानीराज बम्जन, राष्ट्रिय भूमि आयोगका अध्यक्ष रामकुमार पौडेल अध्यक्षका उमेदवारका आकांक्षी रहेका थिए । गत चुनावमा यो पालिकाका सबै वडा र पालिका प्रमुख उपप्रमुख माओवादी केन्द्रका उमेदवार विजयी भएका थिए ।
