सिन्धुली । पछिल्लो समयमा भएको पेट्रोलियम पदार्थ, निर्माण सामग्री लगाएतमा भएको मुल्य वृद्धिका कारण निर्माण उद्योग धरासायी बन्दै गएको र व्यवसायीहरु समेत असुरक्षित रहेको भन्दै निर्माण व्यवसायीहरु आन्दोलनमा उत्रेका छन् ।
निर्माण सामग्रीमा भएको अत्यधिक मूल्य वृद्धिका कारण निर्माण उद्योग धरासायी भैरहेको अवस्थामा सरकारले मूल्य समायोजन गर्नुपर्ने उनीहरुको माग रहेको छ ।
सिन्धुलीका निर्माण व्यवसायीहरुले हालको परिस्थितिमा निर्माण व्यवसायीहरूले पुरानै इस्टिमेट तथा दररेटमा काम गर्न नसक्ने जनाउँदै जिल्ला प्रशासन कार्यालय सिन्धुलीमा धर्ना दिएका छन् भने प्रमुख जिल्ला अधिकारी मार्फत प्रधानमन्त्रीलाई ज्ञापन पत्र समेत बुझाएका छन् ।
सिन्धुली निर्माण व्यवसायी संघका अध्यक्ष उद्धव प्रसाद दाहालको नेतृत्वमा कालो व्यानर सहित जिल्ला प्रशासन कार्यालयको गेटमा धर्ना दिए पश्चात निमित्त प्रमुख जिल्ला अधिकारी दिपेन्द्र पौडेल मार्फत प्रधानमन्त्रीलाई ज्ञापनपत्र बुझाएका हुन् ।
मुल्य वृद्धिका कारण निर्माण व्यवसायीहरू चरम आर्थिक दबाबमा परेको समयमा व्यवसायीहरूलाई कालो सूचीमा राख्ने, बैंक ग्यारेण्टी जफत गर्ने जस्ता कार्यहरू रोक्नुपर्ने निर्माण व्यवसायीहरुको माग रहेको छ ।
निर्माण व्यवसायीहरुले सरकारले समयमै मूल्य समायोजनको निर्णय नगरेका कारण निर्माण कार्य ठप्प हुँदा निर्माण आयोजनाहरू पूर्व निर्धारित समयमै नसकिने जनाउँदै बैंक ज्ञारेण्टी, इन्सुरेन्स तथा थप क्षतिपूर्ति सहित सबै आयोजनाहरूको म्याद थप र बजेट व्यवस्थापनका लागि सरकारसँग माग गरेका छन् ।
यस्तै उनीहरुले निर्माण व्यवसायीलाई आतंकित पार्न गरिएका धरपकड रोक्नु पर्ने समेत माग राखेका छन् । निर्माण उद्योगमा प्रयोग हुने डिजेल, मट्टितेल, बिटुमिन सहितका विविध निर्माण सामग्रीहरू, ढुवानी खर्च तथा श्रमिक लागतमा अस्वभाविक वृद्धि हुँदा निर्माण उद्योग ठप्प हुने स्थितिमा पुगेको निर्माण व्यवसायीहरुले जनाएका छन् ।
व्यवसायीहरुले सरकारलाई अल्टिमेटम दिँदा नेपाल सरकारका विकासे मन्त्रालयका उच्च अधिकारीहरूबाट समेत निर्माण व्यवसायीहरूलाई मूल्य समायोजन दिने विषयमा हालसम्म ठोस निर्णय नगरेकाले अब देशभर सञ्चालित सबै प्रकारका आयोजनाका सम्पूर्ण निर्माण कार्यहरू स्वतः बन्द हुने परिस्थिति सिर्जना भएको समेत ज्ञापन पत्रमा उल्लेख गरिएको छ ।
