सिन्धुली/सिन्धुली जिल्लामा चालु आर्थिक वर्षको ४ महिनामा सवारी दुर्घटनामा परि ज्यान गुमाउनेको संख्या १८ पुगेको छ । चालु यो आर्थिक वर्षमा भएका ३१ वटा दुर्घटनामा यति धेरै मानवीय क्षती भएको जिल्ला ट्राफिक प्रहरी कार्यालय सिन्धुलीले जनाएको छ ।
दुर्घटनामा ज्यान गुमाउनेमा धेरैजसो पुरुष रहेका छन । त्यसमा पनि १८ देखि ३५ वर्ष उमेर समुहका युवाहरु नै रहेको जिल्ला ट्राफिक प्रहरी कार्यालय सिन्धुलीले जनाएको छ । १८ जनामा एक जना महिलाको मृत्यु भएको छ भने १७ जना पुरुष रहेका छन ।
दुर्घटनामा पर्नेमा मोटरसाईकल बढी रहेका छन । पछिल्लो समय जिल्लामा वढ्दै गएको सवारी चाप, युवा पुस्तामा बढेको मोटरसाईकल मोह र दु्रत गतिका कारण सवारी दुर्घटनामा बृद्धि भएको ट्राफिक प्रहरी कार्यालय सिन्धुलीका हवल्दार केशरमान बस्नेतले बताए । दुर्घटनाको मुख्य कारण नै मोटरसाइकल भएको घटनाहरुले देखाएको उनले बताए । उनका अनुसार सबैभन्दा बढी दुर्घटना विपी राजमार्गमा हुने गरेका छन ।
