सिन्धुली । नेपाल सरकारका उपप्रधान तथा रक्षामन्त्री ईश्वर पोखरेलले सरकाकार पाँच वर्ष चल्नेमा ढुक्क हुन सबैलाई आग्रह गरेका छन । स्व. मदन भण्डारीको ६८ औं जन्मजयन्तीको अवसरमा नेकपा जिल्ला कमिटी सिन्धुलीले आयोजना गरेको विचार गोष्ठीलाई सम्बोधन गर्दै उनले प्रधानमन्त्री आलोपालो चलाउने भन्ने कुरा नेकपाको सचिवालयले नजान्ने भन्दै हल्लाको पछि नलाग्न आग्रह गरे ।
भद्र सहमति भएको भन्दै अभद्र तरिकाले चर्चा भएको बताए।
नेकपाका सचिवालय सदस्य समेत रहेका पोखरेलले कार्यकर्ता र जनतालाई दुई अध्यक्षबीच भद्र सहमति भएको भन्दै अभद्र तरिकाले आएका चर्चाको पछाडि नलाग्न अनुरोध गरे । उनले भने, ‘ढुक्क हुनुस् सरकार पाँच वर्ष चल्छ ।’ उनले संविधानसँगै सरकारको संरचाना, व्यवस्था नै परिवर्तन भएकाले त्यसको व्यवस्थापनमा सरकारले एक वर्ष विताएकाले सरकारको कामकाजबारे टिकाटिप्पणी भएको बताउँदै अव विकासको वर्षमा प्रवेश गरेको बताए ।
कार्यकर्तालाई पार्टीको मार्गदर्शन, मदन भण्डारीको जनताको वहुदलिय जनवाद र आजको सन्दर्भमा प्रशिक्षित गर्दै पोखरेलले पार्टी एकता कार्यकर्ताको, जनताको चाहना र राष्ट्रिय आवश्यकता अनुसार भएको बताए ।
मन्त्री पोखरेलले पार्टी एकता भएपछि विचारहरुलाई व्यवस्थित गरि वैज्ञानिक तरिकाले संगठन कमिटिलाई व्यवस्थापन गर्न जरुरी रहेको बताए ।
कार्यक्रममा बोल्दै नेकपाका स्थायी कमिटि सदस्य एवम् पूर्व कृषिमन्त्री हरिबोल गजुरेलले दुई कम्युनिष्ट पार्टीको एकता ठिक समयमा भएकाले यसलाई व्यवहारिक तरिकाले आधारण र संगठनात्मक पद्दतिमा बलियो बनाउनुपर्ने आवश्यकता रहेको बताए । उनले दुई अध्यक्षबीच सरकार र पार्टी सञ्चालनका विषयमा राम्रो छलफल हुनेहुदा सरकार सहि तरिकाले चलेको बताए । गजुरेलले गुट उपगुटले कम्युनिष्ट पार्टी कमजोर हुने बताउँदै पूर्व एमाले र पूर्व माओवादीका राम्रा कुरालाई अंगिकार गरेर अगाडि बढेमा पार्टी बलियो हुने बताए ।
कार्यक्रममा बोल्दै प्रतिनिधिसभा सांसद गणेश कुमार पहाडीले नेपालका कार्लमाक्सका रुपमा मदनभण्डारीलाई व्याख्या गर्दै भण्डारीका हत्यारालाई कम्युनिष्ट पार्टीको सरकारले पत्ता लगाउनुपर्नेमा जोड दिए । नेकपा सिन्धुलीका अध्यक्ष राजन दाहालको अध्यक्षतामा भएको कार्यक्रममा स्वागत गर्दै पार्टी कार्यालय सदस्य प्रलाद पोखरेलले सिन्धुलीगढीको ऐतिहासिक तोप सुपारेटार व्यारेकमा रहेकाले त्यसलाई फिर्ता गर्नका लागि पहल गर्न रक्षामन्त्रीलाई आग्रह गरे ।
