सिन्धुली । कमलामाई नगरपालिकाले टोल विकास संस्थाहरुको समन्वय समिति गठन गरेको छ । पहिलो पटक नगरस्तरीय टोल विकास संस्थाहरुको भेला गरि समन्वय समिति गठन गरेको हो ।
नगरपालिकाको सामाजिक विकास शाखाको आयोजनामा बुधबार सम्पन्न नगरस्तरीय टोल विकास संस्था समन्वय समिति गठन तथा अभिमुखीकरण कार्यक्रममा ११ सदस्यीय नगरस्तरीय समन्वय समिति सर्वसम्मत रूपमा चयन गरिएको हो ।
समन्वय समितिको अध्यक्षमा रेशमबहादुर पोखरेल चयन भएका छन् । त्यस्तै उपाध्यक्षमा बुद्धिमाया स्याङ्तान, सचिवमा बरुण लामिछाने र कोषाध्यक्षमा दुर्गालक्ष्मी श्रेष्ठ र सह–सचिवमा शम्भु श्रेष्ठ चयन भएका छन् ।
यस्तै सदस्यमा घनश्याम ढकाल, कुमारी उमा शर्मा, शान्ति श्रेष्ठ, शर्मिला तामाङ, सञ्जिवनी वि.क तथा प्रभु श्रेष्ठ चयन भएका छन् ।
कार्यक्रममा कमलामाई नगरपालिकाकी उपमेयर मञ्जु देवकोटाले नगरस्तरीय टोल विकास संस्था समन्वय समितिसँग सहकार्य र समन्वय गर्दै नगरपालिकाले काम गर्ने बताईन् ।
कमलामाई नगरपालिकामा दर्ता भएका १०५ वटा टोल विकास संस्थाका अध्यक्ष, सचिव र कोषाध्यक्षहरूको भेलाले नगरस्तरीय समन्वय समिति गठन गरेको हो ।
कार्यक्रममा सामाजिक विकास समिति संयोजक तथा वडा नं. ६ का अध्यक्ष उज्ज्वल थापा, सामाजिक विकास शाखा प्रमुख तुलसीप्रसाद कोइराला, बबिन्द्रलाल माझी लगायत जनप्रतिनिधि, कर्मचारी तथा टोल विकास संस्थाका प्रतिनिधिहरूको सहभागिता रहेको थियो ।
