टंकध्वज थापा
सगरमाथा एक अटल सत्य हो
जहाँ कयौं रेकर्डहरु राखिन्छन्
र,कयौं रेकर्डहरु तोडिन्छन्
सगरमाथालाई –
त्यो अटल सत्यलाई फरक पर्दैन
तर-
सगरमाथा प्रेमीहरुलाई थुप्रै-थुप्रै
फरक पर्दो रहेछ l
म –
आधार शिविरमा उभिएर
त्यो वेश्या जूनलाई सम्झिरहेछु l
यहाँ-
त्यो रण्डो अजम्वरी सूर्य
मेरो निन्द्रा नखुल्दै जन्मन्छ
र मलाई-
मेरो प्यारो सपनाको अन्त्य हुन दिदैंन l
मेरो सपनाको फैलावटमा-
म भिखारी बनिरहेको हुन्छु l
मेरो सपनाको कठघरामा-
मेरी प्रेमिका कैदी बनिरहेकी हुन्छे
म मार्शल आर्टको अभ्यास गर्दै
दगुर्दै हुन्छु- सपनाको कठघरातिर
छ्या ! मैले कठघरा नतोड्दै
तान्न आउँछ-त्यो सूर्य
एउटा बूढो सूर्य !
र,स्खलित हुन्छ-मेरो सगरमाथा l
म यतिखेर-
एकाग्र भएर सम्झिरहेछु
त्यो रण्डो अजम्वरी सूर्य
र त्यो-
नाखार्माउली वेश्या जून !
एउटा बूढो-
मेरो देशको एउटा कुनामा
पारालाईसिसले खाएको आफ्नो खुट्टा तेर्स्याउदै
रेटिरहन्छ-बिरक्तिएको सारंगी
मेरो देशको नाममा l
र,
एउटा तन्नेरी
मेरो देशको बेरोजगार तन्नेरी !
खल्तीबाट पाँच रुपियाँको नोट झिकेर
बिरक्त धूनको मूल्य तिर्ने दुष्साहस गर्छ l
मेरो देशको-
सगरमाथा एक अटल सत्य हो
जहाँ कयौं रेकर्डहरु राखिन्छन्
र,कयौं रेकर्डहरु तोडिन्छन् l
जूनको सौन्दर्य मोहक भएरै त हो
त्यो बूढो सूर्य दौडिएको
र,मेरा निर्दोष सपनाहरु-
आप्पा र गेलुलाई पर्खिरहेछन्-पुराहुने आशमा l
र,सायद-
मेरी प्रेमिका पनि कठघरामा मलाई पर्खिदि हो !
सगरमाथा एक अटल सत्य हो
जहाँ कयौं रेकर्डहरु राखिन्छन्
र,कयौं रेकर्डहरु तोडिन्छन् l
(फेसबुक वालबाट लिईएको)
