सिन्धुली । सिन्धुली कलाघरमा पहिलो पटक सुन्दर नेपाल कला कार्यशाला गरिएको छ । बुधबारबाट सुरु भएको कला कार्यशालामा क्यानभास चित्र निर्माण गर्ने कार्य सुरु भएको हो ।
नेपाल ललितकला प्रज्ञा प्रतिष्ठान र सिन्धुली कलाघरको संयुक्त आयोजनामा क्यानभास चित्र कला निर्माण गरिएको हो । कला कार्यशालामा २० जना कलाकारले एकै थलोमा बसेर क्यानभास चित्र कोरेका छन । उनीहरुले बुधबार र विहिबार कोरेका चित्रको शनिबार कलाघरमा प्रदर्शन गरिने कार्यक्रम रहेको छ ।
कार्यशालामा निर्माण गरिएका क्यानभास चित्रहरु कनपा ३ चपौलीमा निर्माणाधिन राष्ट्रिय कला संग्रहालय सिन्धुली कलाघरमा राखिने कलाघरका अध्यक्ष सुमन थापा मगरले बताए ।
नेपालका विभिन्न जिल्ला काठमान्डौ, नुवाकोट, सुनसरी, मोरङ, कास्की, भक्तपुर, चितवन, ललितपुर, तनहँु लगाएतका जिल्लाबाट २० दक्ष चित्रकारहरु कार्यशालामा सहभागि रहेका छन् । सहभागि कलाकारहरुले संस्कृति, चिनारी लगायत विभिन्न प्रतिविम्वात्मक क्यानभास चित्र कोर्ने छन् ।
नेपाल ललितकला प्रज्ञा प्रतिष्ठानका उपकुलपति लालकाजी लामाले सिन्धुली कलाघरको अभियानलाई सफल बनाउन सानो इट्टा थप्न सकिन्छ की भनेर यो अभियान सुरु गरिएको बताए ।
कार्यशालामा प्रज्ञा प्रतिष्ठानका उपकुलपति लालकाजी लामा, कुशल चित्रकारहरु प्रदिप अधिकारी, सर्मिला श्रेष्ठ, भिम श्रेष्ठ, बिके नरबहादुर, धनु याक्चा, सुजना बगाले, दामोदर बराल, बिनोद लिम्बु, एनबी गुरुङ, पृथ्वी श्रेष्ठ, केशवराज खनाल, सुरक्षा वाग्ले, आशुराम खाइजू, सुरेमा श्रेष्ठ, दिपेन्द्र नेपाली, विपना महर्जन, कला लिम्बु, डीबी राई सुन्दर नेपाल कला कार्यशालामा सहभागी भएका छन ।
