सिन्धुली । कमलामाई नगरपालिका भित्रका बालबालिकाको कला र साहित्यलाई प्रस्फुटन गराउने उद्देश्यले विहिबार सिन्धुलीमाढीमा कमलामाई बालकला तथा साहित्य महोत्सव गरिएको छ । गतवर्षदेखि सुरु गरिएको महोत्सवको यो दोस्रो संस्करण हो ।
कमलामाई नगरपालिका भित्रका ३० वटा विद्यालयको सहभागिता रहेको महोत्सवमा साहित्य तथा कला क्षेत्रमा योगदान पु¥याएका जिल्लाका तीन जना व्यक्तिहरुलाई सम्मान गरिएको छ । सम्मानित हुनेहरुमा जर्वुट्टा कलाकार विश्वम्भर लामिछाने, कवि शम्भु प्रसाद ढकाल (अञ्जुल) र सिन्धुली कलाघरका प्रमुख सुमन थापा मगर रहेका छन् । उनीहरुलाई कला र साहित्यमा उल्लेख्य योगदान दिई जिल्लालाई देशभर चिनाउन योगदान दिएको भन्दै सम्मान गरिएको हो ।
कमलामाई नगरपालिका, गौमति मावि, सामुदायिक रुपान्तरण नेपाल लगाएतका संस्थाहरुको आयोजना तथा चाईल्ड एड नेटवर्कको सहयोगमा भएको महोत्सवमा तीनवटा पुस्तक विमोचन गरिएको छ । कमलामाईका कलम– २, कमलामाईका बाल सृजना २ र धनमाया राईको कथा र कविता संगह सृजनामा सानीको विमोचन गरिएको हो ।
कार्यक्रममा कमलामाई नगरपालिका भित्रका ३० विद्यालयहरुले साहित्य महोत्सवमा सहभागिता जनाएका थिए । सामुदायीक रुपान्तरण नेपालका अध्यक्ष भिमविक्रम थापाको अध्यक्षता तथा कमलामाई नगरपालिकाका उपप्रमुख मञ्जु देवकोटाको प्रमुख आतिथ्यतामा भएको कार्यक्रममा रैथाने उत्पादन, पुस्तकको प्रदर्शनी तथा विक्री स्टल राखिएको थियो भने गणित प्रदर्शनी, विद्यार्थीहरुले सिप सिकेर बनाएका सामग्रीहरुको प्रदर्शनी समेत गरिएको थियो ।
कार्यक्रममा कलाघर सिन्धुलीका कलाकारले पञ्चेबाजा तथा विभिन्न जातिय सांस्कृतिक नृत्य समेत प्रस्तुत गरेका थिए भने सहभागि विद्यालयका विद्यार्थीहरुले समेत नृत्य प्रस्तुत गरेका थिए । कार्यक्रममा निवन्ध, चित्रकला, कथा प्रतियोगिता समेत गरिएको थियो ।
कार्यक्रममा बालकथाकार विजयराज आचार्य, कवि अञ्जुल लगाएतका साहित्यकारहरु, कलाकारहरु, जनप्रतिनिधिहरु, पत्रकारहरु, विभिन्न संघसंस्थाका प्रतिनिधिहरु, शिक्षकहरु, विद्यार्थीहरु लगाएतको सहभागिता रहेको थियो ।
