सिन्धुली÷सिन्धुलीका प्रहरी उपरिक्षक रामेश्वरप्रसाद यादवले जिल्लामा बढ्दै गएको सडक दुर्घटना कम गर्न रुटपर्मिट विनाका सवारी साधन बन्द गर्ने बताए । उनले विपी राजमार्ग लगाएतका जिल्लाका सडकहरुमा चल्ने सवारी साधनको रुटपर्मिटको चेकजाँचमा कडाई गर्ने र सवारीसाधनको ओभर स्पिडलाई नियन्त्रण गर्न पहल गर्ने बताए ।
जिल्ला प्रहरी कार्यालय सिन्धुलीको नेतृत्व समाल्न सोमबार सिन्धुली आएका एसपी यादवले मंगलबार आफ्नै कार्यकक्षमा पत्रकार सम्मेलन गर्दै आफ्ना योजना सार्वजनिक गर्दै उक्त कुरा बताएका हुन ।
उनले जिल्लाका व्यापारिक केन्द्र तथा पसलहरुमा मुल्य सूचि समेत नभएकाले उपभोक्ताहरु खुलेआम ठगिएको पाइएकाले कालोबजारी नियन्त्रण गर्न स्थानीय प्रशासनसँग मिलेर काम गर्ने बताए ।
पत्रकारहरुसँग कुरा गर्दै उनले सशस्त्र समूह नियन्त्रण गर्ने, लागुऔषध नियन्त्रण तथा अवैध ओसारपसार रोक्ने, महिला तथा बालबालिका विरुद्ध हुने सबै खाले हिंसा रोक्नका लागि सबै स्थानीय तहमा पुगि सचेतिकरणका लागि पहल गर्ने योजना रहेको बताए । एसपी यादवले आफ्नो अभियानमा सहयोग गर्न र सल्लाह सुझाव दिन समेत पत्रकारहरुलाई आग्रह गरे ।
