सिन्धुली । सिन्धुली जिल्लाका विभिन्न संघसंस्था, शैक्षिक संस्था, व्यवसायीहरु तथा व्यक्तिबाट रसुवा बाढी पीडितलाई सरकार मार्फत सहयोग गर्ने क्रम जारी रहेको छ ।
जिल्ला प्रशासन कार्यालय सिन्धुलीका अनुसार प्रधानमन्त्री दैवी प्रकोप राहत कोषमा विभिन्न संघसंस्था, विद्यालय, व्यवसायी तथा व्यक्तिहरूबाट कुल २४ लाख ६७ हजार ७ सय ६७ रुपैंया रकम जम्मा भएको प्रशासनले जानकारी दिएको छ ।
जिल्ला प्रशासन कार्यालय सिन्धुलीले कार्यालयको आधिकारीक फेसबुक पेजमा सहयोगदाताको विवरण सार्वजनिक गरि सरकारको कोषमा गएको सहयोग रकमको बारेमा जानकारी दिएको हो ।
रकम जम्मा गरि जिल्ला प्रशासन कार्यालय सिन्धुलीमा जानकारी दिएको विवरण उल्लेख गरिएको जनाउँदै प्रशासनले हालसम्म जिल्लाका ३८ वटा संस्था तथा व्यक्तिहरूले विपद् व्यवस्थापन र राहत कार्यका लागि उक्त योगदान पु¥याएको जनाएको छ । तथ्यांक अनुसार नेपाल वन पैदावार व्यवसायी संघ, सिन्धुलीले सबैभन्दा बढी तीन लाख रुपैंया सरकारलाई सहयोग गरेको छ ।
त्यसैगरी कारागार कार्यालय सिन्धुलीका कैदी बन्दीहरुबाट एक लाख ६० हजार रुपैंया, सिन्धुली निर्माण व्यवसायी संघले १ लाख ५१ हजार, स्मृति प्रतिष्ठान सिन्धुलीबाट १ लाख १० हजार २५३ रुपैंया, कमला एकेडेमीबाट १ लाख १३ हजार राहत कोषमा दाखिला गरेका छन् ।
यस्तै भगवती बोर्डिङ चाईल्ड क्लबबाट १ लाख ३२ हजार ७ सय, नेपाल होटल संघ (हान) सिन्धुलीले १ लाख ४ हजार २८५, भगवती इङ्लिस बोर्डिङ स्कूल १ लाख ५ हजार, सूर्योदय इङ्लिस बोर्डिङ स्कूल १ लाख ११ हजार १११, सिन्धु साकोस एक लाख ११ हजार १११ रुपैंया सहयोग गरेका छन् ।
यसैगरी, विभिन्न शैक्षिक संस्थाहरू, बहुउद्देश्यीय तथा बचत तथा ऋण सहकारीहरू, महिला समूहहरू, युवा समाज, र व्यक्तिगत रूपमा समेत सर्वसाधारणले स्वतःस्फूर्त रूपमा सहयोग रकम जम्मा गरेका छन् ।
उक्त रकम विपद्बाट प्रभावित नागरिकहरूको उद्धार, राहत तथा पुनःनिर्माण कार्यका लागि सहयोग पुग्ने सहयोगदाताहरुले विश्वास व्यक्त गरेका छन् ।
