सिन्धुली । विश्वम्भर लामिछानेको एकल जर्वुट्टा कला संग्रहालय पर्यटन र अध्ययनको उत्कृष्ट गन्तव्य बन्दै गएको छ । संग्रहालयमा रहेका कलालाई १३ महिनामा झण्डै तेईस सय पर्यटकले अवलोकन गरेका छन ।
नेपाल लगाएत ९ देशका नागरिकले कलाको अवलोकन गरेको जर्वुट्टा कला केन्द्र सिन्धुलीका सचिव नारायण लामिछानेले बताएका छन । उनका अनुसार गत आर्थिक वर्षको एक वर्ष र चालु आर्थिक वर्षको भदौ महिनामा २ हजार २ सय ९७ जनाले संग्रहालयको अवलोकन गरेका छन ।
नेपाल, अमेरिका, फिनल्याण्ड, फ्रान्स, स्पेन, न्युजिल्याण्ड, चिन, वेलायत, भारत र अष्ट्रेलियाका नागरिकले संग्रहालयका कलाको अवलोकन गरेका छन ।
कला केन्द्र (संग्रहालय) को अध्ययनका लागि ३ सय ३६ समूहहरु आएका छन । यस्तै संस्थागत अवलोकनका लागि ८४ वटा समूह आए । पारिवारीक तथा व्यक्तिगत रुपमा २८२ जनाले कला संग्रहालयको अवलोकन गरेको जर्वुट्टा कला केन्द्र सिन्धुलीको तथ्यांक रहेको छ ।
कलाकार विश्वम्भर लामिछानेले एकल रुपमा बनाएको जराका कलाहरु अहिले पर्यटन र अध्ययनका लागि उत्कृष्ट गन्तव्य बन्दै गएको पाईएको छ । उनका कलाका बारेमा स्थानीय पाठ्यक्रम तथा देशभरको (कक्षा १–८) आधारभूत तहमा समेत पढाई हुन थालेको छ ।
लामिछानेले २०४८ सालदेखि कला निर्माणको काम सुरु गरेका थिए । आफ्नै लगानी र एकल प्रयासमा उनले हालसम्म ३ सय बढी जराका कला निर्माण गरिसकेका छन ।
कलालाई बहुमुल्य सम्पत्तिका रुपमा लिएका लामिछानेले व्यवस्थापन र संरक्षणको जिम्मा राज्यले लिनुपर्ने बताउँछन । उनले व्यक्तिगत रुपमा संरक्षण गर्दै आएका कला विगत दुई वर्षदेखि जर्वुट्टा कला केन्द्र नामक संस्था स्थापना गरि संरक्षणको जिम्मा दिएका छन ।
कलाको बारेमा सोधपत्र तयार हुने काम समेत सुरु भएको छ । सिन्धुली बहुमुखी क्याम्पसका विद्यार्थी भानुभक्त श्रेष्ठले जर्वुट्टा कलाबाट नेपाली समाजमा आएको परिवर्तन र प्रभाव शिर्षकमा स्नातकोत्तर तहको समाजशास्त्र विषयको आंशिक सोधपत्र तयार गरेका छन । उनले २०७५ सालमा उक्त संग्रहालयका कलाहरुको बारेमा सोधपत्र तयार गरेका हुन ।
बाग्मति प्रदेश सरकारको सहयोगमा संग्रहालयको भवन निर्माण भए पनि फर्निचरको अभावले कलालाई संग्रहालयमा सार्न नसकिएको केन्द्रले जनाएको छ । कलाकेन्द्र स्थापना गर्न लामिछानेकी पत्नी प्रसिद्धा लामिछानेले एक कठ्ठा जग्गा उपलब्ध गराई भवन निर्माण समेत गरिएको छ । हाल जर्वुट्टा कलाहरु कलाकार लामिछानेकै घरमा रहेका छन ।
कला मार्फत समाज, राजनीति, इतिहास लगाएतको अध्ययन गर्ने थलोका रुपमा जर्वुट्टा कला संग्रहालय स्थापित भए पनि हालसम्म उचित व्यवस्थापन हुन नसकेको कलाकार बताउँछन ।
