सिन्धुली । सिन्धुलीको कमलामाई नगरपालिकाले लैंगिक हिंसा नियन्त्रणका सम्बन्धमा रणनैतिक कार्ययोजना बनाउन ९ सदस्यीय कार्यदल निर्माण गरेको छ । कार्यदलमा महिला मानवअधिकार सञ्जालका अध्यक्ष भद्रा राजभण्डारी, अधिवक्ता शुशिला थिङ, पत्रकार तथा मानवअधिकारकर्मी विमला पाण्डे, महिला अधिकारकर्मीहरु सविता कोइराला, रश्मिला देवकोटा, धनकुमारी तामाङ, रमा कार्की, अप्सरा खड्का र जनप्रतिनिधिको तर्फबाट तारा वि.क रहेका छन ।
ओरेक नेपालको सहजीकरणमा कमलामाई नगरपालिकाका जनप्रतिनिधिहरुलाई शुक्रबार र शनिबार रणनैतिक कार्ययोजना निर्माणका सम्बन्धमा रणनैतिक कार्ययोजना निर्माणका लागि छलफल सम्पन्न भएसँगै नगरपालिकाले कार्यदलको निर्माण गरेको हो ।
कार्यदलमा नगरपालिकामा महिला तथा मानवअधिकारका क्षेत्रमा क्रियाशिल महिलाहरुलाई समावेश गरिएको छ भने नगरपालिकाले विशेषज्ञका रुपमा डा. रेणु अधिकारीसँग सहयोग लिने भएको छ । रणनीतिक कार्ययोजना निर्माणमा ओरेक नेपालले समेत सहजीकरण गर्नेछ ।
यसैबीच कार्यदलमा छानिएका सदस्यहरुले विशेषज्ञ डा. रेणु अधिकारीसँग प्रारम्भिक छलफल शनिबार नै गरेको छ । जसले कार्ययोजना निर्माणका चरणहरु र सम्भावित अध्ययनका विषयमा छलफल समेत गरेको छ ।
