रविन्द्र भट्टराई
दुधौली । दुधौली नगरपालिका सिन्धुलीले नगरपालिकाको बजार क्षेत्रमा सडकको क्षेत्राधिकार मिचेर बनाएका घर भत्काउन थालेको छ । दुधौली बजारका घर तथा पसलहरु हटाउन नसक्दा सडक विस्तार तथा स्तर उन्नतीमा समस्या भएको जनाउँदै नगरपालिकाले सडक मिचेर बनाएका घरहरु भत्काउन सुरु गरेको हो ।
सडकको क्षेत्राधिकार मिचेर बनाएका घरहरु भत्काउँदै नगरपालिकाले दुधौली बजारमा २ सय ८० मिटर सडक समेत कालोपत्रे गर्ने भएको छ । नगरपालिकाले दुधौली बजारको सिमलगाछीदेखि गोलपार्क हुदै खोरभञ्झ्याङ जाने सडकको २ सय ८० मिटर सडक कालो पत्रे गर्नका लागि सडक चौडा गर्न थालेको दुधौली नगरपालिका कार्यालयले जनाएको छ ।
सडक १४ मिटर फराकिलो बन्न लागेको र एक करोड ३१ लखमा निर्माण सुरु भएकाले सडक क्षेत्र भित्रका घर भत्काउनुपरेको दुधौली नगरपालिकाका इन्जिनियर संजिब वस्नेतले बताए । उनका अनुसार सडक निर्माणको काम असार मसान्तसम्म सक्नुपर्ने छ र निर्माणको जिम्मा एम के कन्टक्सनले लिएको छ ।
नगरपालिकाले पटकपटक निकालेको सूचनाको अवज्ञा गरेकाले जेसिवी लगाई घर भत्काउन बाध्य भएको नगरप्रमुख घनश्याम राउतले बताए ।
