सिन्धुली । आमाको नाम खुल्ने कागजात सहित नागरिकता बनाउन नागरिकलाई सहजीकरण गर्न जिल्ला प्रशासन कार्यालय सिन्धुलीले जिल्लाका स्थानीय तहलाई परिपत्र गरेको छ ।
सिन्धुलीका सबै स्थानीय तहलाई परिपत्र गर्दै नागरिकताको सिफारिस गर्दा अनुसूचि सहित आमाको नाम खुल्ने आमाको नागरिकता, नागरिकतामा बुवाको नाम नभएमा विवाह दर्ताको सक्कल कागजपत्र सहित जिल्ला प्रशासन कार्यालयमा पठाउन परिपत्र गरेको हो ।
जिल्ला प्रशासन कार्यालय सिन्धुलीमा नागरिकता लिँदा नागरिकतामा आमाको नाम राख्न नपाएको गुनासो रहेको जनाउँदै प्रशासनले वडाबाट सिफारिस गर्दा नै आमाको नाम खुल्ने सक्कल प्रमाणपत्र सहित नागरिकता लिन आउन सहजीकरण गर्न स्थानीय तहलाई परिपत्र गरेको हो ।
जिल्ला प्रशासन कार्यालय सिन्धुलीका प्रशासकीय अधिकृत प्रवीण कटवालले हस्ताक्षर गरि मंगलबार नै उक्त परिपत्र गरेका छन । गत विहिबार जिल्लामा प्रमुख जिल्ला अधिकारीको जिम्मेवारी सम्हाल्न आएका प्रमुख जिल्ला अधिकारी दिनेश सागर भुसालले पत्रकारहरुसँग परिचयात्मक कार्यक्रम राख्ने क्रममा मंगलबार नेपाल पत्रकार महासंघ बागमती प्रदेशका उपाध्यक्ष एवम महिला मानवअधिकार रक्षक सञ्जाल सिन्धुलीका अध्यक्ष बिमला पाण्डेले नागरिकतामा आमाको नाम राख्न प्रशासनले जिम्मेवार भूमिका नखेलेको र सेवाग्राहीको गुनासो बढेको बताएकी थिईन ।
सोहि विषयमा प्रमुख जिल्ला अधिकारी भुसालले नागरिकतामा आमाको नाम संविधान र कानुनले नै राख्ने व्यवस्था गरेकाले त्यस्तो गुनासो आउन नहुने भएकाले वडाबाटै कागजात पु¥याएर आउनका लागि परिपत्र गर्न मातहतका कर्मचारीलाई निर्देशन दिएका थिए ।
जिल्ला प्रशासन कार्यालय सिन्धुलीबाट जारी हुने नयाँ नागरिकता र नागरिकताको प्रतिलिपीमा आमाको नाम थप्न चाहनेले सहजै आमाको नाम राख्न नसकेको सेवाग्राहीको व्यापक गुनासो रहेको छ ।
