सिन्धुली । नेपाल प्रेस युनियन सिन्धुली शाखाले रेडियो विजयकिल्ला तथा विजयकिल्ला टेलिभिजन एचडीका स्टेशन म्यानेजर एवं इमेज टेलिभिजन र नेपाल समाचारपत्रका जिल्ला संवाददाता बुद्ध नेपालीमाथि दर्ता गरिएको मुद्दाप्रति गम्भीर ध्यानाकर्षण भएको जनाएको छ ।
प्रेस युनियनले विज्ञप्ती जारी गर्दै समाचारको विषयलाई लिएर जिल्ला प्रशासन कार्यालय सिन्धुलीमा मुद्दा दर्ता गरिएको घटनाप्रति घटनाप्रति आपत्ति जनाएको हो ।
प्रेस युनियनले जारी गरेको विज्ञप्तिमा सञ्चारमाध्यमले सार्वजनिक सरोकारका विषयमा तथ्यमा आधारित समाचार सम्प्रेषण गर्नु आफ्नो संवैधानिक अधिकार र कर्तव्य भएको उल्लेख गर्दै समाचारको विषयवस्तुप्रति असहमति भए प्रचलित कानुनी प्रक्रिया अनुसार प्रेस काउन्सिल नेपाल वा संवैधानिक निकाय मार्फत समाधान खोजिनुपर्ने बताएको छ ।
युनियनले लोकतान्त्रिक मूल्य–मान्यता र प्रेस स्वतन्त्रताको संरक्षण गर्दै पत्रकारले निर्भीक रूपमा काम गर्न पाउने वातावरण सुनिश्चित गर्नुपर्नेमा जोड दिएको छ । समाचारसँग विषयलाई लिए असान्दर्भिक उजुरी फिर्ता लिई प्रेस स्वतन्त्रताको सम्मान गर्न युनियनले सम्बन्धित पक्षलाई अनुरोध गरेको छ । यस्तै क्षेत्राधिकार भन्दा बाहिर गएर कारवाहि अगाडि नबढाउन जिल्ला प्रशासन कार्यालय सिन्धुली तथा जिल्ला प्रहरी कार्यालय सिन्धुलीलाई आग्रह गरेको छ ।
नेपाल प्रेस युनियन सिन्धुलीका अध्यक्ष बरुण लामिछानेद्वारा हस्ताक्षरित विज्ञप्तिमा प्रेस स्वतन्त्रता विपरीत हुने कुनै पनि गतिविधिप्रति युनियन सधैं सजग रहने र आवश्यक परे थप आन्दोलनका कार्यक्रम समेत अघि बढाइने चेतावनी दिइएको छ ।
