सिन्धुली । जिल्लामा एक वर्षमा ११७ वटा घरेलु हिंसाका घटना भएका छन् । ती घटनामध्ये सबैभन्दा बढी घरेलु हिंसा कमलामाई नगरपालिकामा हुने गरेको तथ्यांक छ । आर्थिक वर्ष २०८२/०८३ मा भएका घटनाहरुमध्ये कमलामाई नगरपालिकामा ६१ दशमलब ५४ प्रतिशत घटना कमलामाई नगरपालिकामा भएको जिल्ला प्रहरी कार्यालय सिन्धुलीले जनाएको छ ।
जिल्ला प्रहरी कार्यालय सिन्धुलीको बार्षिक प्रतिवेदनमा उल्लेख भए अनुसार कमलामाई नगरपालिकामा ७२ वटा घरेलु हिंसाका घटना भएका छन् ।
यस्तै दुधौली नगरपालिकामा १७ वटा घटना भएका छन् । मरिण गाउँपालिकामा १० वटा, तीनपाटन गाउँपालिकामा ६ वटा, गोलञ्जोर गाउँपालिकामा ६ वटा, हरिहरपुरगढी गाउँपालिकामा ३ वटा, सुनकोशी गाउँपालिकामा र घ्याङलेख गाउँपालिकामा १/१ वटा र अन्य १ गरि ११७ घटना भएका छन् ।
घरेलु हिंसामा विशेष गरि खान लाउन नदिने, शारिरिक हिंसा, मानसिक हिंसा, श्रोतसाधनबाट बञ्चित गर्ने, जन्मदतार्, नागरिकता तथा विवाहदर्ता नबनाईदिने लगाएतका घटनाहरु भएका छन् । घरेलु हिंसा प्रायः श्रीमानबाट हुने गरेको प्रहरीको तथ्यांक छ ।
यी घटनाहरुमा १०२ वटा घटनामा मिलापत्र भएको छ भने १५ वटा घटनाका पीडित पक्ष अदालत गएका छन् । यो तथ्यांक अनुसार ८७ दशमलब १८ प्रतिशत मुद्दा मिलापत्रमा गएको देखिन्छ भने १२ दशमलब ८२ प्रतिशत मुद्दा थप कानुनी प्रक्रियाका लागि अदालत गएको देखिन्छ ।
