सिन्धुली । कमलामाई नगरपालिका वडा नं. ९ लाई बालश्रम मुक्त वडा निर्माणका लागि शुक्रबार सामुहिक प्रतिवद्धता जाहेर गरिएको छ । भिमान बजार क्षेत्र समेत रहेको उक्त वडामा बालश्रम मुक्त बनाउनका लागि वडाका जनप्रतिनिधिहरु, राजनीतिक दलका प्रतिनिधिहरु, स्थानीय सेवा प्रदायक संस्थाका प्रतिनिधिहरु, कर्मचारीहरु, विद्यालय, स्वास्थ्य संस्था, नीजि तथा सार्वजनिक व्यवसायीहरु, सञ्चारकर्मीहरु, सुरक्षाकर्मी लगाएतका सरोकारवालाले हस्ताक्षर गरि प्रतिवद्धता जनाएका हुन ।
वडा र नगरपालिकालाई बालमैत्री बनाउने एक पाईलाका रुपमा वडालाई बालश्रम मुक्त बनाउन सामुहिक लिखित प्रतिवद्धता जनाईएको हो । ‘बालबालिकालाई सुनौँ, हरेक दिन हरेक बालबालिकाको अधिकारको लागि जुटौँ’ भन्ने मूल नाराका साथ बालश्रम मुक्त वडा घोषणाका लागि सरोकारवालाबीच अभिमुखीकरण तथा सामूहिक प्रतिवद्धता गरिएको हो ।
वडा नं. ९ का वडा अध्यक्ष विनोद प्रधानको अध्यक्षता तथा कार्यवाहक नगर प्रमुख मञ्जु देवकोटाको प्रमुख आतिथ्यतामा सम्पन्न कार्यक्रममा वडाका जनप्रतिनिधिहरु, नगरपालिकाका विभिन्न शाखा प्रमुखहरू, ईलाका प्रहरी कार्यालय भिमानका प्रमुख राजु केसी, वडा स्तरीय बालअधिकार समिति र बालमैत्री स्थानीय शासन समितिका पदाधिकारीहरू, भिमान स्वास्थ चौकीका प्रतिनिधि, मेलमिलापकर्ता, शिक्षाविद्, समाजसेवी, ह्याण्ड्स नेपालका प्रतिनिधिहरु, महिला स्वास्थ्य स्वयंसेविका, बाल क्लबका प्रतिनिधिहरु लगाएको सहभागिता रहेको थियो ।
कार्यक्रममा बोल्दे कार्यवाहक नगर प्रमुख मञ्जु देवकोटाले बालबालिकाको अधिकार संरक्षण र उनीहरूको चौतर्फी विकास स्थानीय सरकारको प्राथमिकतामा रहेको बताईन ।
उनले बालश्रम एक गम्भिर समस्या भएको र यसको अन्त्यका लागि समुदायका सबै सरोकारवालाहरूको सक्रिय भूमिका आवश्यक रहेको बताईन ।
वडा नं. ९ का वडा अध्यक्ष विनोद प्रधानले वडालाई पूर्ण रूपमा बालश्रम मुक्त बनाउनका लागि कार्ययोजना सहित काम सुरु गरेको बताए ।
उनले वडाले घर–घरमा पुगेर सचेतना जगाउने, बालश्रममा संलग्न बालबालिकाहरूको पहिचान गर्ने र उनीहरूलाई शिक्षा र अन्य सहयोग उपलब्ध गराउने लगाएतका काम योजना अनुसार गर्न थालिएको बताए ।
छलफलमा सहभागीहरूले वडाभित्र रहेका बालश्रमका चुनौतीहरू, सम्भावित समाधानका उपायहरू र यस अभियानलाई कसरी दिगो बनाउन सकिन्छ भन्नेबारे आफ्ना धारणाहरू राख्दै ऐक्यबद्धता जनाएका थिए । सोही क्रममा जनचेतना जगाउनका लागि भिमान बजार क्षेत्रका पसल र सार्वजनिक स्थानहरूमा बालश्रम विरुद्धका चेतनामूलक स्टिकरहरू समेत टाँसिएको छ ।
