सिन्धुली । प्रहरीले लागु औषध ओसार पसार नियन्त्रणका लागि एक्सनमा काम सुरु गरेको छ । इलाका प्रहरी कार्यालय भिमान, लागुऔषध नियन्त्रण व्युरो बर्दिबास र बागमती प्रदेश प्रहरी कार्यालय हेटौडाले लागु औषध ओसारपसार र प्रयोगमा कडाई गरेको हो । तालिम प्राप्त कुकुरको सहायतामा उक्त कार्य गरिरहेको छ । यहि क्रममा शुक्रबार भिमानबाट लागु औषध सहित दुई जनालाई पक्राउ गरेको छ ।
सवारी साधनमा चेकजाँच गर्ने क्रममा लागु औषध ट्यावलेट र खैरो हिरोईन सहित दुई जना पक्राउ परेको जिल्ला प्रहरी कार्यालय सिन्धुलीका एसपी लालध्वज सुवेदीले जानकारी दिएका छन् ।
उनका अनुसार धरानबाट काठमान्डौ जाँदै गरेको वा३ख९७२६ नम्बरको हायसमा सवार धरान उपमहानगरपालिका वडा नं. ६ सुनसरीका २४ वर्षिय उज्जल कार्की एसपीएएसटिएआईएन ट्यावलेट ४३ वटा, टिआरएएमएडिओएल ट्यावलेट ४३ वटा र ०.३२० ग्राम खैरो हिरोईन सहित पक्राउ परेका छन् ।
यस्तै चेकजाँचका क्रममा धनगढी उपमहानगरपालिका वडा नं. १ कैलालीका ३१ वर्षिय मिन कुमार चौधरी पनि खैरो हिरोईन सहित पक्राउ परेका छन् ।
बा३ख७७९५ नम्बरको हायसमा धरानबाट काठमान्डौ जाँदै गरेका चौधरीलाई ३.१५० ग्राम खैरो हिराईन सहित पक्राउ गरिएको सुवेदीले जानकारी दिए । उनीहरुलाई पक्राउ गरि थप अनुसन्धान सुरु गरिएको सुवेदीले जनाए ।
