सिन्धुली । दुधौली बजारका दुई वटा खाद्य पसललाई विहिबार जरिवाना गरिएको छ । म्याद नाघेका खाद्य पदार्थ बिक्री कक्षमा राखेको, बिल नराखेको तथा खाद्य भण्डारण कक्ष अव्यवस्थित रहेको पाइएका दुई खाद्य पसललाई कारवाहि गरिएको हो ।
जिल्ला स्तरीय बजार अनुगमन टोलीले दुधौली बजार अनुगमन गर्ने क्रममा कैफियत भेटिएका व्यवसायीलाई जरिवाना गरेको हो । बंगलामुखी किराना पसल र अनिश स्टोर्सलाई कारवाहि गरिएको अनुगमन समितिले जनाएको छ । उनीहरुलाई जनही १५ हजार जरिवाना गरिएको छ ।
सहायक प्रमुख जिल्ला अधिकारी दिपेन्द्र पौडेलको नेतृत्वमा गरिएको अनुगमनमा म्याद नाघेका खाद्य सामग्रीहरु समेत बरामद गरिएको थियो । दुधौलीका २६ वटा होटल, खाद्य पसल लगाएतमा अनुगमन गरिएको थियो । ती पसलहरुबाट म्याद नाघेका ४ हजार ३ सय ५० रुपैंया बराबरका सामग्री बरामद गरि नष्ट गरिएको खाद्य प्रविधि तथा गुण नियन्त्रण डिभिजन सिन्धुलीका प्रमुख दिनेश सुवेदीले जानकारी दिएका छन् ।
सुवेदीका अनुसार अनुगमनमा जिल्ला प्रशासन कार्यालय सिन्धुली, उद्योग तथा वाणिज्य कार्यालय सिन्धुली,. खाद्य प्रविधि तथा गुण नियन्त्रण डिभिजन कार्यालय सिन्धुली, कोष तथा लेखा नियन्त्रक कार्यालय सिन्धुली, दुधौली नगरपालिका, प्रहरी, उद्योग वाणिज्य संघका प्रतिनिधि, पत्रकार सहितका सरोकार संयुक्त अनुगमन टोलीले दुधौली नगरपालिकाका मुख्य बजार क्षेत्रका खाद्य बजार, होटल पसलहरुको अनुगमन गरेको थियो ।
अनुगमनका क्रममा व्यवसाय सञ्चालन गर्दा खाद्य पदार्थमा स्वच्छता तथा गुणस्तर कायम राख्न आवश्यक निर्देशन र सुझाव दिइएको थियो साथै व्यवसायीले पालन गर्नुपर्ने ऐन बमोजिमको दायीत्वका बारेमा समेत सचेत गराईको थियो ।
