सिन्धुली । एमालेको एघारौं राष्ट्रिय महाधिवेशनको मतगणना सकिएको छ । मत परिणाम अनुसार जिल्लाबाट प्रतिनिधित्व गर्दै केन्द्रीय सदस्यमा तीनजना केन्द्रीय सदस्यमा निर्वाचित भएका छन् भने एक जना आयोगको सदस्यमा निर्वाचित भएका छन् ।
केन्द्रीय सदस्यमा निर्वाचित हुनेमा बागमती प्रदेशतर्फ महिलामा निरु कुमारी दर्लामी, आदिवासी जनजाती कलष्टरको खुल्लातर्फ विषमलाल अधिकारी दनुवार र खुल्लातर्फ प्रदीप कटुवाल निर्वाचित भएका छन् । तीनै जना केपी ओलीको प्यानलबाट उमेदवार भएका थिए ।
यस्तै अनुशासन आयोगको सदस्यमा रणकुमारी बलम्पाकी मगर निर्वाचित भएकी छिन् । बलम्पाकी पनि ओली प्यानलबाटै उमेदवार बनेकी थिईन ।
महाधिवेशनमा ८ जनाले केन्द्रीय सदस्यमा उमेदवारी दिएका थिए । आयोगको सदस्यमा २ जनाले उमेदवारी दिएका थिए । जिल्लाबाट खुल्ला सदस्यतर्फ प्रदीप कटुवाल, सुवास देवकोटा र गणेश कुमार पहाडीको उमेदवारी परेको थियो । आदिवासी जनजाती खुल्ला सदस्यमा विषमलाल अधिकारी दनुवार, आदिवासी जनजाती युवातर्फ दिपक कुमार माझी, बागमती प्रदेशतर्फ युवामा लाल बहादुर बुढाथोकी, र दलित कलष्टरतर्फको युवामा सरोज वि.कको उमेदवारी परेको थियो ।
अनुशासन आयोगको सदस्यमा रणकुमारी बलम्पाकी मगर र लेखा आयोगको सदस्यमा तारानिधि पोखरेलको उमेदवारी रहेको थियो । जिल्लाबाट गणेश कुमार पहाडी र तारानिधि पोखरेलको उमेदवारी इश्वर पोखरेल प्यानलबाट निर्वाचनमा प्रतिस्पर्धामा रहेका थिए । युवाहरुको प्रतिनिधित्व गर्दै उमेदवार बनेका लाल बहादुर बुढाथोकी, सरोज वि.क र दिपककुमार माझी दुवै टिममा परेका थिएनन् ।
