सिन्धुली । खाद्य उद्यमी महिला, विद्यार्थी तथा उपभोक्ताहरुलाई बुधबार सिन्धुलीमाढीमा खाद्य पोषण सम्बन्धि एक दिने तालिम दिईएको छ । खाद्य प्रविधि तथा गुण नियन्त्रण डिभिजन कार्यालय, सिन्धुलीको आयोजना तथा सौगात लघु उद्यम सहकारी संस्थाको समन्वयमा पचास जनालाई उक्त तालिम दिईएको हो ।
तालिममा खाद्य उद्यमी व्यवसायी महिला, उपभोक्ता, जनज्योती बहिरा माध्यमिक बिद्यालयका छात्रा लगायतका विद्यार्थीहरुको सहभागिता रहेको थियो ।
कार्यक्रममा कार्यालयका प्रमुख दिनेश सुवेदीले खाद्य व्यवसाय सञ्चालन गर्नु पूर्व आवश्यक पूर्व तयारी, व्यवसायको संरचना निर्माण, कार्यालयबाट खाद्य अनुमति पत्र लिने प्रक्रिया, राजस्व दस्तुर सम्बन्धि जानकारी, खाद्य ऐन बमोजिमका व्यवसायका अनिवार्य दायित्व, खाद्य पदार्थको प्याकेजिंग तथा लेबलिंग सम्बन्धि कार्यपत्रका बारेमा प्रशिक्षण दिएका थिए ।
यस्तै कार्यालयका खाद्य निरीक्षण अधिकारी अतिस घिमिरेले खाद्य स्वच्छता कायम गर्न अपनाइने उपायहरु, व्यक्तिगत सरसफाई, औधोगिक सरसफाई, खाद्य पदार्थ भण्डारण गर्दा तापक्रम नियन्त्रण, खाद्य पदार्थ प्रशोधन गर्दा परिक्षण, रंग र तेलको प्रयोग सम्बन्धमा प्रशिक्षण दिएका थिए ।
तालिममा खाद्य स्वच्छता, खाद्य गुणस्तर, पोषण, सन्तुलित आहार कसरि तयार गर्ने भन्ने विषयमा जानकारी गराइएको थियो । खाद्य पदार्थमा सकेसम्म बेसार, केसर प्राकृतिक रङ्ग प्रयोग गर्न र जथाभावी अखाद्य रंगको प्रयोग नगर्न, पत्रपत्रिकामा खाद्य पदार्थ राखेर बिक्री वितरण नगर्न, औषधि जस्तै खाद्य पदार्थमा पनि लेवल विवरण (उत्पादकको नाम, उत्पादन, उपभोग्य अवधि, ब्याच नम्बर, समिश्रण) हेरेर मात्र खरिद तथा बिक्रि गर्ने बानीको विकास गर्न जानकारी गराईएको थियो ।
सौगात लघु उद्यम सहकारी संस्थाका अध्यक्ष विमला थापाले आफुहरु खाद्य पदार्थ उत्पादन प्रशोधनमा लामो समयदेखि काम गरिरहेको भए पनि कतिपय प्राविधिक र ऐन नियमका विषय जानकारी नभएको अवस्थामा कार्यक्रम निकै प्रभावकारी उपयोगी रहेको बताइन् ।
