सिन्धुली । सुनकोशी नदीले बगाउँदै गरेको शव प्रहरीले मंगलबार साँझ खुर्कोटमा निकालेको छ । गोलञ्जोर गाउँपालिका वडा नं. ७ तल्लो बजार नजिकै सुनकोशी नदीले बगाउँदै गरेको शव स्थानीयले देखेपछि प्रहरीलाई खबर गरेका थिए ।
शव बगाउँदै ल्याएको प्रहरीले जानकारी पाएपछि इलाका प्रहरी कार्यालय खुर्कोट र सशस्त्र प्रहरीको विपद व्यवस्थापन वेश खुर्कोटको गोताखोर टोलीले शव नदीबाट निकालेको थियो ।
करीव ४०, ४५ वर्ष जस्तो देखिने पुरुषको शव नदीबाट निकालिए पनि कसको हो भन्ने पहिचान खुल्न नसकेको जिल्ला प्रहरी कार्यालय सिन्धुलीका डिएसपी सूर्यप्रकाश सुवेदीले जानकारी दिए ।
सुवेदीका अनुसार मृतक व्यक्तिको दाहिने हातको नाडीमा एनयुआरजेआईटि लेखिएको ट्याटु रहेको, दाहिने कानमा दुई वटा चाँदी जस्तो देखिने मुन्द्रा लगाएको र शरिरको तल्लो भागमा निलो कलरको कट्टुमा रातो कलरको ३ वटा धर्सा रहेको छ ।
