सिन्धुली । असोज १२ गते विहान ११ बजे रोशी हुँदै सुनकोशीमा आएको बाढीले गोलञ्जोर ७ खुर्कोटको बसपार्क क्षेत्र र तल्लो बजार नै बगायो । रोशी र तामाकोशीको बहाव बढेसँगै सुनकोशीको बहाव उच्च हुने भन्दै सुरक्षाकर्मीले अलर्ट गराएपछि स्थानीयहरुले ज्यान त जोगाए तर घर, घरका सामान, लत्ताकपडा, अन्न, पसलका सामान केहि पनि जोगाउन सकेनन । विगतका वर्षहरुमा जस्तो बाढी आउँदा विध्वंश नै गर्ने गरि आउँछ भन्ने स्थानीयहरुलाई लागेन र घर र पसलका सामान सारेनन । स्थानीय व्यवसायी बालकृष्ण श्रेष्ठका अनुसार सुरक्षा अलर्ट अनुसार स्थानीयले ज्यान त जोगाए तर धनसम्पत्ति भने जोगाउन सकेनन ।
सुनकोशीमा अत्यधिक बाढी आएपछि सुनकोशीमा भएको पक्कि पुलमा काठहरु अड्किए । पुल थुनियो । नयाँ वस्ती र वसपार्क क्षेत्र पुरै डुवायो । जब पुल भत्कियो बाढीले बस्तीका घर, व्यवसाय, वस्ती सबै बगायो । सामान निकाल्न चाहेकाले पनि सबै निकाल्न भ्याएनन ।
वि.सं. २०४१ सालको बाढी पनि हेरेका श्रेष्ठले आजसम्मकै ठूलो बाढी भने । उनका अनुसार ०४१ सालमा आएको बाढीमा पनि बस्तीमा सामान्य पानी पसे पनि यसपालीको जस्तो ठूलो क्षति गरेको थिएन । झोलुंगे पुलको पखेटा मात्रै हल्लाएको थियो । बुढापाकाका अनुसार त्यस अघि पनि त्यति ठूलो बाढी आएको थिएन र पछि पनि आएको थिएन । रातीमा बाढी आएको भए धेरै नै मानवीय क्षति हुने उनको अनुमान छ ।
बाढीले बजार पुरै बगर जस्तो बनायो । धेरैको घर, पसल सबै भौतिक संरचना भत्किए, पुरिए । घरका बालुवाका चाङ निकाल्न स्थानीयलाई लामो समय लाग्यो । अझ भनौं बाढी आएको ७ महिना वितिसक्दा पनि अझै पुरै सरसफाई सकिएको छैन ।
घरभरी थुप्रिएका बालुवा, काठ र पाँको अझै बाँकी छ । कति घरहरु पूर्ण ध्वस्त छन त कतिपयमा आंशिक क्षति छ । नयाँ वस्तीका करीब ३५, ४० घर र वसपार्क क्षेत्रका करीव ६० घर पसलमा बाढीले क्षति पु¥यायो ।
बसपार्क क्षेत्रका फलफुल पसलहरु अहिले पनि सञ्चालनमा आउन सकेका छैनन । बसपार्कमा हुने सवारी आवागमन, पसलको चहलपहल हुन सकेको छैन । एकाध पसल खुलेपनि न रौनकता छ न सुन्दरता । साना ठूला घर पसल गरेर ६० वटा भन्दा बढी व्यवसायीक संरचना थिए बसपार्कमा । जुन बाढीमा खण्डहर भएका थिए । अहिले पनि उस्तै खण्डहर नै छन । भत्किएका संरचना बन्न सकेका छैनन ।
बाढीले सुनकोशीको छेउँमै रहेको खुर्कोट बजारका घर पसल मात्र हैन खुर्कोट रामेछाप जोड्ने पक्कि पुल र झोलुंगे पुल दुवै बगायो । पुलचोक र बसपार्क क्षेत्रका सार्वजनिक संरचना तथा नीजि संरचनाहरु ध्वस्त बनायो । जुन अहिले पनि भग्नावशेष नै छन ।
बस्ती र बजार नै खण्डहर हुने गरि बाढीले क्षति गर्दा अरबौंको क्षति भएको थियो । नेपाल सरकारका दश वटा नयाँ शहर मध्येको खुर्कोटको एक क्षेत्रका भौतिक संरचनाहरु पूर्ण रुपमा ध्वस्त भए । नयाँ शहर योजनामा बनेका हेलिप्याड, रंगशाला लगाएतका संरचनाहरु पूर्ण रुपमा ध्वस्त भएका थिए । रामेछाप सिन्धुली जोड्ने पुल बाहेक अरु संरचना अहिले पनि बनेका छैनन ।
यस्तै बाढीले गोलञ्जोर गाउँपालिकाका बलेनी, हैवार, मुर्गिवेशी, ग्वालटार लगाएतका विभिन्न स्थानमा भौतिक क्षति गरेको थियो । सुनकोशी गाउँपालिकाको मुलकोटमा पनि अत्यधिक क्षती गरेको थियो । मुलकोट पनि अझै पूर्ण रुपमा उठ्न सकेको छैन । दुम्जा, नेपालथोकका क्षेत्रहरु उस्तै खण्डहर छन । घर, वस्ती, खेतियोग्य जमिन, व्यवसायीक क्षेत्र, विद्यालयहरु, सडक सबैतिर क्षति भएका संरचनाहरु पुनः सञ्चालनमा आउन कठिन भईरहेको छ । यता फिक्कल पनि उक्त बाढीबाट अछुतो रहेन । मध्यपहाडी राजमार्गमा पनि क्षती पुग्यो । यो बाढीमा २ जनाले ज्यान समेत गुमाए ।
रोशीले दुम्जा, नेपालथोक क्षेत्रमा ठूलो क्षति गरेको छ । विपी राजमार्ग वर्षातको समयमा चल्न सक्ने वा नसक्ने निश्चित छैन । गर्मिमा धुलाम्मे सडकमा यात्रा गरेका सवारी साधन तथा यात्रुहरु हिलाम्मे बगरमा यात्रा गर्नुपर्ने निश्चित छ ।
सरकारले सडक वर्षातको समयमा समेत सञ्चालन गर्ने योजना अनुरुप निर्माण गरिरहेको छ तर बन्ने सम्भावना न्युन छ । अहिले पनि विपी राजमार्ग जोखिमपूर्ण यात्रा जारी छ ।
