सिन्धुली । फागुन २७ गते हुन लागिरहेको सिन्धुली उद्योग वाणिज्य संघको निर्वाचनमा जिल्लाका पुराना व्यवसायी राजकुमार श्रेष्ठले अध्यक्षमा स्वतन्त्र उमेदवारी दिएका छन । उनले कुनै पनि राजनीतिक दलहरुको समर्थन विना उमेदवारी दिएका हुन । उनले नेपाली कांग्रेस र नेकपा माओवादी केन्द्रको संयुक्त प्यानलबाट उमेदवारी दिएका निवर्तमान अध्यक्ष अर्जुन कुमार श्रेष्ठसँग स्वतन्त्र प्रतिस्पर्धा गर्नेछन ।
३० वर्षदेखि सिन्धुली उद्योग वाणिज्य संघमा आवद्ध भई तीन कार्यकाल उपाध्यक्ष पदमा नेतृत्व गरेका राजकुमारले शुक्रबार सिन्धुलीमाढीमा पत्रकार सम्मेलनको आयोजना गरि आफ्नो उमेदवारीका सवालमा आफ्नो धारणा सार्वजनिक गरेका छन ।
उनले प्यानल निर्माण नगरि स्वतन्त्र रुपमा उमेदवारी दिएको पत्रकार सम्मेलनमा बताए । तीस वर्षको संस्थागत अनुभवलाई कार्यान्वयन गर्न, व्यवसायीक हक अधिकार र समस्या सम्बोधन गर्नका लागि आफु सिन्धुली उद्योग वाणिज्य संघको नेतृत्वमा जान लागेको बताए ।
उनले आफुले एक कार्यकाल द्धितिय उपाध्यक्ष, एक कार्यकाल प्रथम उपाध्यक्ष र एक कार्यकाल उद्योग उपाध्यक्ष भएर नेतृत्व गरेको अनुभव र दलिय हस्तक्षेप विना संस्था सञ्चालन गर्नका लागि आफुले उमेदवारी दिएको बताए ।
नौ वर्षअघि अध्यक्षमा चुनाव उठेका राजकुमारले थोरै मतले पराजित भएका थिए । त्यसपछिका २ कार्यकाल सहमतिका नाममा आफुभन्दा जुनियर साथीहरुलाई सर्वसम्मत गराएको भन्दै यो पटक आफुलाई निर्वाचित गराई नेतृत्व गर्ने अवसर दिन व्यवसायीहरुलाई आग्रह समेत गरेका छन ।
त्यागी व्यवसायीको छवी बनाएका श्रेष्ठले आफ्नो उमेदवारी एकल र स्वतन्त्र रहेकाले विना संकोच सहयोग गर्न समेत अपिल गरेका छन । सामाजिक संघसंस्थामा नेतृत्वमा जाँदा राजनीतिक हिसावले जाँदा संस्थाको छवी र सन्देश सकारात्मक नजाने भएकाले आफुले स्वतन्त्र उमेदवारी दिएको पनि उनले प्रस्ट गरे ।
‘उद्योग वाणिज्य संघ नितान्त व्यवसायीहरुको संस्था भएकाले सबै आस्थाका व्यवसायीहरु अटाउन सक्नुपर्छ’, उनले जोड दिए । राजनीतिक हस्तक्षेपले सबै व्यवसायीको भावनाको प्रतिनिधित्व गर्न नसक्ने पनि उनको दावी रहेको छ ।
पत्रकार सम्मेलनमा उनले आफ्नो कार्ययोजना सहितको १५ बुँदे प्रतिवद्धता समेत सार्वजनिक गरेका छन । उनले एक कार्यकालका लागि मात्रै आफु नेतृत्वमा जान खोजेको समेत स्पष्ट गरेका छन । उनले पर्यटन विकासदेखि संस्थागत विकास, साना व्यवसायीको अधिकारदेखि ठूला व्यवसायीसम्मको संरक्षणलाई समेटेर चुनावी प्रतिवद्धता तयार गरेका छन ।
