सिन्धुली । गौमती वातावरण समन्वय टोल विकास संस्थाले भवन निर्माण गरि उद्घाटन गरेको छ । कमलामाई नगरपालिका वडा नं. ५ नयाँ वस्तीमा रहेको उक्त टोल विकास संस्थाको दुई कोठे भवन शनिबार उद्घाटन गरिएको हो ।
वागमति प्रदेश सभा सदस्य छेत्रबहादुर बम्जनले उक्त भवन उद्घाटन गरेका हुन । कमलामाई नगरपालिका भित्रका टोल विकास संस्थामध्ये आफ्नै भवन बनाएर कार्यालय स्थापना गर्ने यो पहिलो टोल विकास संस्था हो ।
कमलामाई नगरपालिकाको नाममा रहेको दुई धुर जग्गामा दुई कोठे भवन बनाईएको संस्थाका अध्यक्ष जमुना श्रेष्ठले बताएकी छिन । संस्थाको १२ औं साधारणसभा तथा चौथो अधिवेशनको अवसरमा भवन उद्घाटन गरिएको हो । उक्त भवन वडा नंंं ६ को ३ लाख र वडा नं. ५ को ६ लाख गरि नौ लाख रुपैंया लागतमा निर्माण गरिएको हो ।
अधिवेशनका अवसरमा संस्थाले नियमित बचतकर्ता कमल बहादुर श्रेष्ठ र विष्णुमाया मगरलाई नगद र प्रमाणपत्र सहित सम्मान समेत गरेको छ । त्यस्तै संस्थासँग सहकार्य गरि विकासको काममा सहयोग गर्ने प्रदेशसभा सदस्य छेत्र बहादुर बम्जन, कनपा ५ का वडा अध्यक्ष पूर्ण बहादुर खड्का र कनपा ६ का वडा अध्यक्ष उज्जल थापालाई समेत संस्थाले सम्मान गरेको छ ।
संस्थाको अधिवेशन तथा भवन उद्घाटन गर्दै प्रदेशसभा सदस्य छेत्रबहादुर बम्जनले टोल टोलबाट नै देश सुधारको अभियान सुरु हुनुपर्ने बताएका छन । उनले राजनीतिक दलका नेताहरु एक आपसमा झगडा गरेर देश र जिल्ला बनाउन नसकेको बताए । उनले सिन्धुली जिल्लाका नेताहरुको नेतृत्व फितलो भएकाले विकास हुन नसकेको समेत बताएका छन ।
संस्थाका अध्यक्ष जमुना श्रेष्ठको अध्यक्षता एवम वागमती प्रदेशसभा सदस्य बम्जनको प्रमुख आतिथ्यतामा सम्पन्न भएको हो । अधिवेशनले नयाँ कार्यसमिति चयन गर्नुपर्ने भए पनि नयाँ कार्य समिति केहि दिनमा टुंगो लगाउने गरि अधिवेशन स्थगित भएको संस्थाका कोषाध्यक्ष समिर विक्रम थापाले बताए ।
