सिन्धुली । सिन्धुली अस्पतालमा ९ महिनादेखि अवरुद्ध रहेको अप्रेशन सहितको प्रसुति सेवा मंगलबारदेखि फेरी नियमित गरिएको छ । प्रसुति रोग विशेषज्ञ तथा सर्जन नहुदा अवरुद्ध सेवा अस्थायी रुपमा सुचारु गरिएको हो । शुभजीवन अस्पताल खुर्कोटमा कार्यरत डा. राजन न्यौपानेलाई हप्ताको २ दिन करारमा लिएर अस्पतालले अप्रेशन सेवा सुचारु गरेको हो ।
आइतबार र मंगलबार डा. न्यौपानेले अप्रेशन सहितको प्रसुति सेवा दिने छन । आपतकालिन रुपमा अपे्रशन गर्नुपरेमा जुनसुकै दिन पनि उनले सेवा दिने भएका छन । अस्पताल विकास समितिका अध्यक्ष प्रलाद पोखरेलका अनुसार सुत्केरी हुन अस्पतालमा आउने महिलालाई आपतकालिन अवस्थामा सर्जन नहुदा रिफर गर्नुपर्ने भएकाले करारमा डाक्टर ल्याइ सेवा सुरु गरिएको हो । अस्पतालमा दैनिक ५, ७ जना महिलाहरु सुत्केरी हुन आउने गर्छन । मासिक करिब १०, १२ जना महिलाको अप्रेशन गर्नुपर्ने अवस्था आउने गरेको छ ।
अस्पतालमा लामो समयदेखि अप्रेशन सेवा अवरुद्ध हुदा सबै सामानहरु विग्रीएकाले पुनः सामानको जोहो गरि अप्रेशन सेवा सुरु गरिएको छ । अप्रेशन सहितको प्रसुती सेवा सञ्चालनका लागि आवश्यक पर्ने औषधिहरु समेत अस्पतालको फार्मेसीमा नभएको र मेडिकल सुपरिटेन्डेन समेत साउनदेखि अस्पतालमा नहुदा उधारोमा औषधि तथा सामान खरिद गरि सेवा सुरु गरिएको पोखरेलले बताए ।
अस्पतालमा स्त्री रोग तथा प्रसुति विज्ञको दरबन्दी भए पनि डाक्टर नआउँदा समस्या भएको छ । प्रदेश नं. ३ सरकारले डा.अञ्जु थापालाई अस्पतालमा पठाएको भए पनि उनी अस्पतालमा आएकी छैनन । जसका कारण प्रसुति सेवालाई नियमित सञ्चालन गर्न समस्या भएको पोखरेलले बताए । ९ महिनाको अवधिमा सिन्धुली अस्पतालबाट करिब एकसय महिलालाई अप्रेशनका लागि बाहिर रिफर गरिएको अस्पतालले जनाएको छ ।
