सिन्धुली । लागु औषध दुरुपयोग तथा ओसारपसार विरुद्धको ३७ औं अन्तर्राष्ट्रिय दिवस सिन्धुलीमाढीमा मनाईएको छ । जिल्ला प्रहरी कार्यालय सिन्धुलीको आयोजनामा बुधबार भएको कार्यक्रममा ‘म ड्रग्सको हिम्मत गर्दिनँ’ भन्ने प्रतिवद्धतामा हस्ताक्षर गरि दिवस मनाईएको हो । योसँगै औपचारिक कार्यक्रमको आयोजना गरिएको थियो ।
विभिन्न सांगितिक तथा सांस्कृतिक कार्यक्रम सहित दिवस मनाईएको छ । जिल्ला प्रहरी कार्यालय सिन्धुलीका प्रमुख एसपी गोविन्दराज काफ्लेको अध्यक्षता एवम् जिल्ला समन्वय समितिका प्रमुख कार्साङ लामाको प्रमुख आतिथ्यतामा भएको कार्यक्रममा बोल्ने वक्ताहरुले जिल्लामा लागु औषध प्रयोगकर्ता र ओसारपसार बढेकाले पुनस्र्थापना केन्द्र स्थापनाको आवश्यकता रहेको बताएका छन ।
जिल्ला समन्वय समिति सिन्धुलीका प्रमुख कार्साङ लामाले जिल्लामा लागु औषध प्रयोग र कारोबार अत्यधिक बढेको बताउँदै पुनस्र्थापना केन्द्र स्थापनाको आवश्यकता रहेको बताए । उनले लागु औषध नियन्त्रण गर्नु सबैको जिम्मेवारी रहेको बताए । लामाले स्थानीय तहले नीति तथा कार्यक्रम बनाउँदा लागु औषध नियन्त्रणको विषयलाई प्राथमिकता दिन आग्रह गरे ।
कार्यक्रममा बोल्दै जिल्ला समन्वय समितिका उपप्रमुख शान्ता कार्कीले बालबालिकालाई नैतिक शिक्षामा जोड्न आग्रह गरिन ।
यस्तै कार्यक्रममा बोल्दै प्रमुख जिल्ला अधिकारी भरत खनालले जिल्लाका कारागार हिरासतमा लागु औषध कारोवारीहरु बढ्दै गएको र लागु औषध प्रयोगकर्ता बढेको बताए । उनले जिल्ला लागु औषधको हव बन्दै गएको बताउँदै पुनस्र्थापना केन्द्र स्थापना गर्न ढिलो भईसकेको बताएका छन ।
कार्यक्रममा बोल्दै जिल्ला प्रहरी कार्यालय सिन्धुलीका एसपी गोविन्दराज काफ्लेले जीवनको महत्व थाहा नपाउनेहरु लागु औषधको कुलतमा लाग्ने गरेको बताए । उनले सबै जिम्मेवार बन्न सकेमा लागु औषध नियन्त्रण गर्न सकिने बताए । उनले पनि जिल्लामा लागु औषध प्रयोगकर्तालाई उपचार तथा मनोसामाजिक परामर्शका साथै सामाजिक रुपमा पुनःस्र्थापना गर्नका लागि पुनःस्र्थापना केन्द्रको आवश्यकता रहेको बताए ।
कार्यक्रममा नेपाल पत्रकार महासंघका अध्यक्ष कृष्णहरी घिमिरे, बाल सञ्जाल कमलामाई नगरपालिकाका दिवस थापा लगाएतले मन्तव्य व्यक्त गरेका थिए । कार्यक्रममा प्रहरी निरिक्षक सुनिल प्रसाद चौरासियाले लागु औषध रोकथाम तथा न्युनिकरण सम्बन्धि प्रस्तुतिकरण गरेका थिए ।
कार्यक्रममा कलाघर सिन्धुलीका अध्यक्ष सुमन थापाले जित बहादुरको सचेतनामूलक कथा बाचन गरेका थिए भने कलाघर सिन्धुली र वारियर डान्स सेन्टरले नृत्य प्रस्तुत गरेका थिए । यस्तै कार्यक्रम स्थल बाहिर लागु औषध विरुद्ध लडौं, रोकथाममा जोड दिउँ नारा सहितको कार्यक्रमको व्यानरसँगै बेलुन उडाईएको थियो ।
