सिन्धुली । मंगलबार गोलञ्जोर गाउँपालिका वडा नं. ७ मा रहेको खुर्कोट बजारमा प्रमुख जिल्ला अधिकारी भरत खनालको नेतृत्वमा संयुक्त अनुगमन गरिएको छ । विपी राजमार्ग र मध्यपहाडी राजमार्गको संगम रहेको खुर्कोटका होटल तथा फलफूल पसलको अनुगमन गरिएको हो ।
खुर्कोट बजारका १५ वटा होटल, १० वटा फलफूल पसल र किराना पसलहरुमा समेत अनुगमन गरिएको हो । अनुगमनका क्रममा म्याद नाघेका १० हजार ३ सय रुपैंया बराबरका सामानहरु नष्ट गरिएको खाद्य प्रविधि तथा गुण नियन्त्रण डिभिजन कार्यालय सिन्धुलीका प्रमुख पुष्पलाल राईले बताए ।
उनका अनुसार प्यान नं. नलिएका १० वटा फलफूल तथा किसाना पसललाई ७ दिनभित्र प्यान दर्ता गर्न निर्देशन गरिएको छ । खाद्य अनुमति पत्र नलिएको साथै सरसफाई नभएको एक बेकरी उद्योगको उत्पादन विक्री वितरण बन्द गरिएको छ ।
अनुगमनमा प्रमुख जिल्ला अधिकारी भरत खनाल, जिल्ला प्रहरी कार्यालय सिन्धुलीका प्रमुख एसपी गोविन्दराज काफ्ले, गोलञ्जोर गाउँपालिकाका उपाध्यक्ष ज्वालाप्रसाद न्यौपाने, उद्योग तथा वाणिज्य कार्यालयका प्रमुख ध्रुव प्रसाद ढकाल, खाद्य प्रविधि तथा गुण नियन्त्रण डिभिजन कार्यालय सिन्धुलीका प्रमुख पुष्पलाल राई, करदाता सेवा कार्यालयका प्रतिनिधि, पत्रकार लगाएतको सहभागिता रहेको थियो ।
