डोल्पा – डोल्पाका स्थानीय तहहरूमा समानान्तर सरकारको रुपमा डोल्पा काँग्रेसले गठन गरेकोे छाया सरकारको पहिलो बैठकले स्थानीय जनप्रतिनिधिहरूले गरेको स्वेच्छाचारी कामको विरोध गर्ने देखि नगरमा ताला लगाउने सम्मको चरणबद्ध कार्यक्रमहरू गर्ने निर्णय गरेको छ।
त्रिपुरासुन्दरी नगरपालिका त्रिपुराकोटमा गठन गरिएको छाया सरकारको पहिलो बैठकले आफ्ना कार्ययोजना सार्वजनिक गर्दै नगरपालिकाको पहिलो नगरसभाले आव ०७४–०७५ का लागि विनियोजित गरेको बजेट तथा छनौट गरिएका योजनाको सिलिङ्ग, मनोमानी तवरले नगरका पदाधिकारीहरूले खरिद गरिएका कार्यालयीय सामान तथा निमार्ण सामाग्रीहरूको बिल भरपाई विवरण माग, अंगुर स्याउ र डालेचुकको खेतीको नाममा नर्सरी निमार्ण बिरुवा खरिदमा भएको आर्थिक अनियमितताका सम्बन्धमा बिरुवाको संख्यात्मक विवरण खरिद तथा ढुवानीमा लागेको खर्च बिल भरपाईको माग बिना सुचना एकलौटी रुपमा नियुक्ति दिइएका कर्मचारीको विवरण लगायतको सुचनाहरू लिखत रुपमा माग गर्ने निर्णय गरेको छ।
त्रिपुरासुन्दरी नगरपालिका अन्तर्गतको छाया सरकारका संयोजक मोतीप्रसाद उपाध्यायको अध्यक्षतामा बसेको बैठकले पहिलो चरण अन्तर्गत कार्ययोजना नगरमा पेस गर्ने, सबै विवरण उपलब्ध गराउन सात दिनको अल्टीमेटम दिने उक्त समय भित्रमा विवरण उपलब्ध भएमा छाया सरकाले छानबीन गरि अनुगमन तथा निरीक्षण गर्ने सुधारको लागि दवाव दिने र छाया सरकारले गरेको माग अनुसारका विवरण उपलब्ध नगराएमा नगरप्रतिनिधिहरूको विरोधमा भण्डाफोर अभियान संचालन, नगरप्रतिनिधिको पुत्ला दहन लगायत नगरपालिकामा ताला लगाउने सम्मका चरणबद्ध कार्यक्रम गर्ने निर्णय गरेको हो।
डोल्पाका स्थानीय तहहरूमा बाम जनप्रतिनिधिहरूको बहुमत रहेकोले प्रतिपक्षको भावना विपरीत गइ नगरमा निर्णयहरू गरिदै आएको, हचुवाको भरमा बजेट उपलब्ध गराएको तथा योजना बाँडफाँडमा विभेद गरिएको, मनपरी रुपमा बजेट खर्च गर्ने गरिएको, कर्मचारीहरूले डोल्पा नगरको नाममा नेपालगन्जमा मोटरसाईकल खरिद गरेर ब्यक्तिगत प्रयोजनमा प्रयोग गरिएको लगायतका कार्यहरू रोक्न र नगरप्रतिनिधिहरुको ओझेलमा पारिएका सर्बसाधारणलाई स्थानीय सरकारको प्रत्याभुति दिलाउन भन्दै डोल्पा काँग्रेसले वैशाखको दोश्रो सातामा त्रिपुरासुन्दरी नगरपालिकाको त्रिपुराकोटमा छाया सरकार गठन गरेको थियो।
