सिन्धुली । सिन्धुलीका १०६ टोललाई सफा स्वच्छता टोल घोषणा गरिएको छ । कमलामाई नगरपालिका, दुधौली नगरपालिका, मरिण गाउँपालिका, सुनकोशी गाउँपालिका र तीनपाटन गाउँपालिकाका टोलहरुलाई सरसफाईका मापदण्ड पुरा गरेर टोललाई सफा स्वच्छता टोल घोषणा गरिएको हो । जसमा २ हजार २ सय घरधुरी समेटिएको ह्याण्ड्स नेपालले जनाएको छ ।
लैंगिकतामा आधारित खानेपानी तथा स्वच्छता वासएसडिजी परियोजनाको समिक्षा गर्दै विहिबार यस्तो जानकारी गराईएको हो । प्लान नेपाल इन्टरनेशनलको सहयोगमा मानव तथा राष्ट्रिय विकास समाज नेपाल सिन्धुलीले परियोजनाको अन्तिम समिक्षा गरेको हो ।
समिक्षामा परियोजनाले १० वटा खानेपानी योजना निर्माण तथा मर्मतको काम गरेको, सामुदायीक संस्थाहरु, विद्यालयहरुमा संस्थागत क्षमता विकासका काम गरेको, समुदाय परिचालनमा लैंगिक सहभागिता र रुपान्तरणका काम गरेको उल्लेख गरिएको छ ।
यो परियोजनाले जिल्लाका पाँच स्थानीय तहका २५ वटा वडामा खानेपानी, स्वच्छता सम्बन्धि कार्यक्रम गरेको थियो भने कार्यक्रम लागु भएका पालिकामा खानेपानी स्वच्छतासँग सम्बन्धित कानुन निर्माणमा प्राविधिक तथा प्रक्रियागत सहयोग समेत गरेको थियो । यो परियोजना अन्तर्गत ४० विद्यालयमा वास सुविधा पुगेको समेत संस्थाले जनाएको छ ।
स्थानीय तहले साझा सूचि र एकल सूचिभित्रको खानेपानी, सरसफाई तथा स्वच्छता सम्बन्धि कानुन निर्माणमा ध्यान नदिएको देखिएको पनि समिक्षामा उल्लेख गरिएको छ ।
स्थानिय सरकार संचालन ऐन २०७४ ले दिएको अधिकारमा रहेकार स्थानिय कानुन वनाउन आवश्यक रहेको देखिएको समिक्षामा उल्लेख गरिएको छ । पूर्ण सरसफाई मार्गदर्शन २०७३ लाई कार्यान्वयन गर्न परियोजनाले पाँचवटै पालिकालाई खानेपानी सरसफाई तथा स्वच्छता ऐन २०८०, गाउँपालिकाको खानेपानी सरसफाई तथा स्वच्छता निययामावली २०८०, खानेपानी सरसफाई तथा स्वच्छताको गुणस्तर अनुगमन मार्गदशन २०८०, गाउँपालिकाको विधालय खनेपानी सरसफाई तथा स्वच्छता सम्वन्धी कार्यविधि २०८०, खाद्य स्वच्छता एवम गुणस्तर अनुगमन निर्देशिका २०८०, मर्यादित महिनावारी ब्यवस्थापन निर्देशिका २०८० र फोहर मैला ब्यवस्थापन कार्यविधि २०८० गरि सात वटा ऐनहरु निर्माण र कार्यान्वयनमा सहजीकरण गरिएको जनाएको छ ।
