सिन्धुली । जिल्लाकी पहिलो अटो चालक जानुका गौतम (रेखा) अन्तर्राष्ट्रिय श्रमिक महिला दिवसका अवसरमा सम्मानित भएकी छिन । राजनीतिक, सैन्य जीवनपछि सामाजिक जीवनमा आएकी गौतमलाई १११ औंं श्रमिक महिला दिवसका अवसरमा महिला मानवअधिकार सञ्जाल सिन्धुलीले सम्मान गरेको हो ।
उनलाई अटा चालक भएर अन्य महिलालाई उत्प्रेरणा दिएको र अन्य महिलालाई अटो चालकका रुपमा व्यवसाय सञ्चालन गर्न प्रोत्साहन गरेको भन्दै सम्मान गरिएको हो । गौतम १२ वर्षको उमेरमा तत्कालिन माओवादीले गरेको जनयुद्धमा लागेकी थिइन ।
जनयुद्धका बेला वाईसिएलको नेता, जनमुक्ति सेनामा लडाकु थिईन । माओवादी शान्तिपूर्ण राजनीतिमा आएपछि उनी जिल्ला खेलकुद विकास समितिको अध्यक्ष भएसँगै सामाजिक जीवनमा आएकी थिईन ।
करीव ६ वर्षदेखि उनी सिन्धुलीमा अटो चालकका रुपमा काम गरिरहेकी छिन । उनीसँगै जिल्लामा ३० जना अटो चालक महिला रहेको उनले बताएकी छिन । भद्रकाली अटो प्रा.लिका अध्यक्ष रहेकी गौतमको कम्पनीमा अढाई सय अटो रहेका छन । महिला दिवसका अवसरमा आइतबार सिन्धुलीमाढीमा आयोजित महिला समानता, समान कामका लागि समान ज्याला विषयक अन्तक्र्रिया कार्यक्रममा उनलाई सम्मान गरिएको हो ।
सञ्जालका अध्यक्ष अप्सरा खड्काको अध्यक्षतामा भएको कार्यक्रममा बोल्दै महिला नेता तथा सामाजिक अभियन्ताहरुले महिलाहरुले कानुनत धेरै अधिकारका उपलब्धिहरु प्राप्त गरेको भए पनि कार्यान्वयनमा समस्या रहेको बताए । उनीहरुले महिला हिंसाका घटनाहरु बढ्दो रहेको र न्याय सम्पादनको अवस्था कमजोर रहेको बताएका छन । उनीहरुले महिला अधिकारका सवालमा राजनीतिक सामाजिक सांस्कृतिक अधिकारलाई पूर्ण रुपमा कार्यान्वयन ल्याएर अगाडि बढ्नु पर्नेमा जोड दिएका छन ।
कार्यक्रममा नेपाल पत्रकार महासंघ सिन्धुलीका उपाध्यक्ष एवम् इन्सेक जिल्ला प्रतिनिधि बिमला पाण्डेले अन्तर्राष्ट्रिय श्रमिक महिला दिवस र यसको सान्दर्भिकता, नेपालमा महिला अधिकार तथा सिन्धुली जिल्लामा लैंगिक हिंसाको अवस्थाका बारेमा प्रकाश पारेकी थिइन ।
नेकपा एमालेका केन्द्रीय सदस्य उमा कोईराला, जिल्ला समन्वय समिति सिन्धुलीका उपाध्यक्ष सम्झना अधिकारी दनुवार, भूमि समस्या समाधान आयोगका सदस्य विष्णु पाण्डे, जिल्ला समन्वय समितिका सदस्य गंगा कार्की, महिला नेतृ शान्ता पाख्रिन, अन्तर्पार्टी महिला सञ्जालका अध्यक्ष सविता कोइराला, नेपाली कांग्रेसकी शान्ता कार्की, जिफन्टका अध्यक्ष निरु श्रेष्ठ, कमलामाई नगरपालिकाका शिक्षा शाखाका प्रमुख हितकुमारी पौडेल लगाएतले मन्तव्य व्यक्त गरेका थिए ।
कार्यक्रममा सञ्जालका सदस्य सम्झना भोलनले स्वागत गरेकी थिइन भने उपाध्यक्ष रमा कार्कीले कार्यक्रममा सहजीकरण गरेकी थिइन ।
