बिमा लुंगेली
सिन्धुली । जिल्लामा सर्वाधिक राशी पुरस्कार सहितको स्व. नरबहादुर बम्जन स्मृति कप फुटबल प्रतियोगिता हुने भएको छ । मरिण गाउँपालिका वडा न. ५ का स्थानीय स्व. नरबहादुर बम्जनको स्मृतिमा उनका छोराहरु प्रतिष्ठित निर्माण व्यवसायी एवं समाजसेवी छेत्र बम्जन, ङेमा बम्जन र विष्णु बोम्जनको आर्थिक सहयोगमा व्लु अल्पाईन क्लबले उक्त खेल गराउने भएको हो ।
बम्जन परिवारको ६ लाख आर्थिक सहयोग तथा ब्लु अल्पाइन क्लब सिन्धुलीको आयोजनामा फागुन १३ गतेदेखि सिन्धुलीमाढीमा रहेको खुलामञ्चमा प्रतियोगिता हुने भएको विहिबार पत्रकार सम्मेलन मार्फत जानकारी दिईएको छ ।
उक्त प्रतियोगिताका विजेतालाई २ लाख १० हजार र उपविजेतालाई १ लाख नगद पुरस्कारको व्यवस्था गरिएको आयोजक संस्थाले जनाएको छ । क्लबका अध्यक्ष सूर्य बहादुर थापाले नगद पुरस्कार सहित खेलाडीलाई प्रमाणपत्र, मेडलको समेत व्यवस्था गरिएको छ भने खेल अवधिभरका लागि खेलाडीको सुरक्षाका लागि विमा समेत गरिने भएको छ ।
‘बुबाको त्याग, अथक मेहनत र उर्जाका कारण हामी यो स्थानमा छौं । बुबाले देखाउनु भएको सहि बाटो पछ्याउँदै उहाँकै सम्झनामा पहिलो पटक फुलबल प्रतियोगिता गर्न लागेका हौं ।’ स्वर्गीय नरबहादुरका कान्छा छोरा बिष्णु बम्जनले भनेका छन । खेलको प्रत्येक टिममा पाँच जना खेलाडी बाहिरबाट ल्याउन दिइने समेत आयोजकले जनाएको छ ।
वि. सं. १९९४ मा जन्मनु भएको स्वर्गीय नरबहादुरको ७३ वर्षको उमेरमा २०६७ साल पुस ५ गते निधन भएको थियो । तत्कालिन समयका पूर्व बृटिस सेना समेत रहनु भएका उहाँका दुई श्रीमती तर्फको ३ छोरा र ६ जना छोरीहरु रहेका छन ।
