सिन्धुली । नेपाल रेडक्रस सोसाईटी सिन्धुलीले स्थापनाको पचास वर्ष पुरा गरेको छ । उक्त अवसरमा बुधबार ५० औं साधारणसभा तथा स्वर्ण जयन्ती वर्ष उद्घाटन कार्यक्रमको आयोजना गरिएको छ ।
उक्त अवसरमा रेडक्रसले आफ्ना संस्थापक सभापति सहित ७ जना पूर्व सभापतिहरुलाई सम्मान गरेको छ । रेडक्रस सिन्धुलीले संस्थापक अध्यक्ष कृष्णहरि अधिकारी, पूर्व सभापतिहरु कृष्णहरि बराल, अम्बरदीप देवकोटा, कृष्णप्रसाद ढकाल, फाल्गुणी शर्मा तिमल्सिना, विश्वम्भर लामिछाने र कुलमणी आचार्यलाई सम्मान गरेको हो ।
स्वर्ण जयन्तीका अवसरमा कोभिड १९ जोखिमका बेलामा जीवनको प्रवाह नगरी विरामी ओसारपसार तथा शव व्यवस्थापनमा खट्ने २ जना एम्बुलेन्स चालक र एकजना शव वाहन चालकलाई समेत सम्मान गरिएको छ । उनीहरुलाई जोखिममा उत्कृष्ट काम गरेको भन्दै रेडक्रस सिन्धुलीले ५ हजार नगद, प्रमाणपत्र र दोसल्ला ओढाई सम्मान गरेको हो ।
यसरी सम्मानित हुनेमा एम्बुलेन्स चालक अर्जुन कुमार श्रेष्ठ र चेत बहादुर डिम्दोङ रहेका छन भने शव वाहन चालक पदम बहादुर थापालाई शव व्यवस्थापनमा जोखिम मोलेर काम गरेको भन्दै सम्मान गरिएको छ ।
यस्तै रेडक्रसले आपतकालिन रक्तसञ्चार केन्द्रका लागि एकवर्ष भित्र रक्तदान गर्ने ११ वटा संस्थालाई सम्मान गरेको छ । सम्मानित हुनेमा सिन्धुली बहुमुखी क्याम्पस, रेडक्रस भिमान उपशाखा, रेडक्रस माढीबजार उपशाखा, सिन्धु बचत तथा ऋण सहकारी संस्था, मिलीजुली बचत तथा ऋण सहकारी संस्था, नेपाल विद्यार्थी संघ सिन्धुली, रेडक्रस दुधौली शाखा, रेडक्रस सुनकोशी शाखा, बहुउद्देश्यीय कृषक सहकारी संस्था सुनकोशी र रोट¥याक्ट क्लब अफ सिन्धुलीलाई सम्मान गरिएको हो ।
नेपाल रेडक्रस सोसाईटी सिन्धुलीका सभापति अशोक श्रेष्ठको अध्यक्षता एवम् कमलामाई नगरपालिका सिन्धुलीका मेयर खड्ग खत्रीको प्रमुख आतिथ्यतामा भएको कार्यक्रममा बोल्दै मेयर खत्रीले फस्ट हुनका लागि एक्लै दौडेर नभई सयजनामा दौडेर देखाउन आग्रह समेत गरेका छन । रेडक्रसले प्रतिस्पर्धामा अग्रणी संस्थाको भूमिका निर्वाह गरेको बताउँदै उनले एक्लै दौडेर नभई समूहमा दौडेर खेल जित्न समेत आग्रह गरे ।
उनले नगरपालिकाले रेडक्रसको कामका कारण सहकार्य गरिरहेको बताउँदै रेडक्रसले साथ दिएका कारण कमलामाई नगरपालिकाको मोतियाविन्दुको निःशुल्क शल्यक्रिया कार्यक्रम सफल भएको दावी गरेका छन । उनले समन्वय, सहकार्यलाई प्राथमिकता दिदै मानवसेवामा लागेका कारण रेडक्रस सफल भएको समेत दावी गरे ।
कार्यक्रममा बोल्दै नेकपा (ओली) पक्षका प्रतिनिधि महेन्द्रदेव श्रेष्ठ, नेकपा (प्रचण्ड माधव) पक्षका नेता ज्वाला प्रसाद न्यौपाने, नेपाली कांग्रेसका सभापति उज्जल बराल, नेपाली कांग्रेसका नेता माणिक ढकाल, नेपाल पत्रकार महासंघ सिन्धुलीका उपाध्यक्ष बिमला पाण्डे, रेडक्रस सिन्धुलीका पूर्व सभापति फाल्गुणी शर्मा तिमल्सिना लगाएतले रेडक्रसले गरेका मानवीय तथा सामाजिक सेवा, विपदमा उद्धार, राहत र पुनःस्र्थापनामा गरेका उल्लेख्य कामको प्रशंसा गरेका थिए ।
कार्यक्रममा रेडक्रस सिन्धुलीका मन्त्री लालबहादुर कार्कीले प्रगति प्रतिवेदन तथा आगामी कार्यक्रम प्रस्तुत गरेका थिए भने कोषाध्यक्ष सकुन्तला श्रेष्ठले आर्थिक प्रतिवेदन पेश गरेकी थिईन । कार्यक्रममा उपसभापति मेनुका सुवेदीले स्वागत मन्तव्य व्यक्त गरेकी थिईन ।
