सिन्धुली । सिन्धुलीका स्रष्टाले सडकमै आएर साहित्य र सृजना मार्फत भारतले आफ्नो नक्सामा हालेको नेपालको भूमि लिम्पियाधुरा, लिपुलेक र कालापानी आफ्नै भएको भन्दै सरकारले यसलाई फिर्ता ल्याउनु पर्नेमा जोड दिए । उनीहरुले राष्ट्रिय सरोकारको विषयमा सिन्धुलीबासीसँगै रहेको जानकारी समेत गराए । ‘सिमा अतिक्रमण विरुद्धमा सडकमा स्रष्टाहरु’ भन्दै जनतालाई राष्ट्रियता रक्षाका लागि जागरुक बनाउन पनि उनीहरुले थालेको जनाएका छन ।
यहि अभियान लिएर जिल्लाका गाउँ गाउँमा जान थालेका स्रस्टाहरुले शनिबार सिन्धुलीमाढीको जनता हाटबजारमा सडकमै उभिएर साहित्य सृजनाका साथै कला र गलामार्फत भारतको चर्को विरोध गरे ।
सोहि अवसरमा स्रष्टा भानु गुरुङले कवितामै भनेका छन,
महाकाली पनि खाईसक्यो, कोशी यिनैले खाए
कर्णाली पनि खाए
अब हुदा हुदा लिम्पियाधुरा लिपुलेख र कालापानी मेरो भन्छ ।
गौतम बुद्ध मेरो भन्थ्यो कुन दिन राजधानी मेरो भन्छ
तर खबरदार तिमी विस्तारवादी
हाम्रो भूमि टेक्ने कोशिस नगर
विर वलभद्र र अमरसिंहका सन्तान हौं हामी
नेतामा नैतिकता हराए होला
तर जनतामा राष्ट्रियता हराएको छैन
तिम्रा अत्याधुनिक हतियारसँग
नेपाली जनता डराएको छैन
अझै पनि हेर हाम्रो खुकुरीमा धार मेटिएको छैन
उनी सकडमा कविता वाचन गर्दै भनिरहेका थिए …
हाँसी हाँसी मर्न तयार छौं
जस्तो सुकै संंघर्ष गर्न तयार छौं
यस्तै गजलकार खडानन्द तिमल्सिनाले गजल मार्फत भने,
हाम्रो देशको नक्साबाट छुटका ती भूमि
लिपुलेक र कालापानी आउनुपर्छ सरकार
यतिवेला देशको गीत गाउनुपर्छ सरकार
राष्ट्रप्रेम हृदयमा छाउनुपर्छ सरकार
छिमेकीको नक्साभित्र हाम्रो भूमि पर्दा
फिर्ता गर भन्न पाउनुपर्छ सरकार
लिपुलेक र कालापानी आउनुपर्छ सरकार
यतिबेला देशको गीत गाउनुपर्छ सरकार
गजलको अन्तिम शेरमा तिमल्सिनाले सरकारलाई अनुरोध गर्दै भनेका छन
छिमेकीले सिमानामा गिद्धेनजर लाए
विद्युतिय घेराबेरा लाउनुपर्छ सरकार
कार्यक्रममा करीव २ दर्जन स्रस्टाले आफ्ना सृजना मार्फत सरकारलाई सिमा रक्षा गर्न आग्रह गरेका छन भने नेपालीलाई राष्ट्रियता रक्षाका लागि एक भई अगाडि बढ्न आग्रह गरेका छन । कार्यक्रममा राजनीतिक दलका नेता, व्यवसायी, नागरिक समाज, सञ्चारकर्मी, विद्यार्थीहरु, शिक्षक लगाएतको उपस्थिति थियो ।
कार्यक्रममा नेकपाका नेता यमकुमार देवकोटा, नेपाली कांग्रेस सिन्धुलीका सभापति उज्ज्वल बराल, नेकपा माक्र्सवादीका योगेन्द्र पराजुली, नेपाल पत्रकार महासंघका उपाध्यक्ष बिमला पाण्डे, विद्यार्थी नेता भानुभक्त श्रेष्ठले सिमा विवाद समाधान गर्न सरकार अन्तर्राष्ट्रिय अदालत जानुपरे पनि पछि पर्न नहुने र सिमा विवाद समाधान गर्नुपर्ने बताए । उनीहरुले सरकारले आफ्नो भूमि रक्षा गर्नुपर्ने बताएका छन ।
उमानाथ शास्त्रीय सिन्धुलीय साहित्यीक प्रतिष्ठानको आयोजनामा भएको कार्यक्रममा कार्यक्रममा प्रगतिशिल लेखक धनमाया राई, साहित्यकार प्रज्वल सिन्धुलीय, शेषराज दाहाल, सारदा पहाडी, केदार देवकोटा, दुर्गादेवी ढकाल, सिता सत्याल, कल्याण पहाडि, केशव कुमार फुयाँल, महेश्वर प्रसाद कोइराला, अग्रिम अधिकारी, गोकर्ण प्रसाद सुवेदी, छत्र बस्नेत, चुडाराज देवकोटा रवि क्षत्री, सावित्रा उमारा, गायिका सन्ध्या देवकोटा लगाएतले आफ्नो सृजना प्रस्तुत गरी भारत सरकारले गरेको सिमा अतिक्रमणको विरोध गरेका थिए । उनीहरुले नेपाललाई आत्मनिर्भर बनाउन र सिमा अतिक्रमणमा परेको भूभाग फिर्ता गरि वाल लगाउन समेत सुझाव दिएका थिए ।
