सिन्धुली । जिल्लामा एक वर्षमा १०२ जना विपद प्रभावित किसानलाई राहत उपलब्ध गराईएको छ । आर्थिक वर्ष २०८२÷०८३ मा कृषि क्षेत्रमा विपद्बाट क्षति बेहोरेका किसानलाई कृषि विकास कार्यालय सिन्धुलीले २२ लाख बढी राहत वितरण गरेको हो । बागमती प्रदेश सरकारको सहयोगमा २२ लाख ३३ हजार ६ सय ६९ रुपैयाँ राहत वितरण गरिएको कृषि विकास कार्यालय सिन्धुलीका प्रमुख अनुप अधिकारीले बताएका छन् ।
उनका अनुसार फागुन महिनाको हावाहुरी, असोजमा आएको बाढी–पहिरो तथा चैत महिनाको असिना पानीबाट कृषिबालीमा क्षति पुगेका किसानहरुलाई राहत दिईएको हो ।
धान, तरकारी, फलफूल, च्याउ, किवी, खरबुजा लगायतका कृषि बाली तथा व्यवसायमा पुगेको क्षतिको आधारमा राहत उपलब्ध गराइएको हो । विपद्का कारण व्यवसायमा ठूलो क्षति बेहोरेका कृषकलाई आर्थिक राहत मार्फत केहि हदसम्म राहत र सान्त्वना दिने उद्देश्यले रकम वितरण गरिएको हो ।
राहत वितरणका लागि बागमती प्रदेश सरकारले मंसिर ९ गते सूचना प्रकाशित गरी चैत मसान्तसम्म निवेदन माग गरेको थियो । प्राप्त निवेदनका आधारमा जिल्ला समन्वय समिति सिन्धुलीका प्रमुख कारसाङ लामाको अध्यक्षतामा रहेको समितिले प्रहरी मुचुल्का, कृषि प्राविधिकबाट तयार गरिएको क्षतिको लागत अनुमान, फोटो तथा भिडियो प्रमाण र स्थानीय तहको सिफारिसका आधारमा राहतका लागि सिफारिस गरिएको थियो ।
उक्त सिफारिस २०८३ वैशाख ३० गते प्रदेश सरकारमा पठाइएपछि राहत रकम उपलब्ध गराइएको हो । राहत पाउनेमध्ये सबैभन्दा धेरै घ्याङ्लेख गाउँपालिकाका ७८ जना कृषक रहेका छन् । उक्त पालिकामा मात्रै धान खेतीमा ६ लाख ४० हजार ५ सय ५० रुपैयाँ बराबरको क्षति भएको कार्यालयको तथ्यांकमा उल्लेख गरिएको छ ।
यस्तै फिक्कल गाउँपालिकाका ५ जना, गोलन्जोर गाउँपालिकाका ४ जना, मरिण गाउँपालिकाका ४ जना, कमलामाई नगरपालिकाका ३ जना, सुनकोशी गाउँपालिकाका ३ जना, दुधौली नगरपालिकाका १ जना तथा हरिहरपुरगढी गाउँपालिकाका ४ जना कृषकले राहत प्राप्त गरेका छन् ।
कार्यालयका अनुसार धान खेती बाहेक जिल्लाका विभिन्न पालिकामा तरकारी, फलफूल, च्याउ, किवी, खरबुजा लगायतका खेती तथा कृषि व्यवसायमा १५ लाख ९३ हजार १ सय १९ रुपैयाँ बराबरको क्षति भएको थियो । सोही क्षतिको मूल्यांकनका आधारमा राहत वितरण गरिएको अधिकारीले बताएका छन् ।
