सिन्धुली । सोमबार सिन्धुलीमा भएका छुट्टाछुट्टै दुर्घटनामा २९ जना घाईते भएका छन । विपी राजमार्गको खुर्कोट, चियावारीघुम्ति र मदनभण्डारी राजमार्गको दुधौलीमा फरक फरक सवारी साधन दुर्घटना भएको प्रहरीले जनाएको छ ।
सोमबार विहान दुधौली नगरपालिका वडा नं. ५ घारीथुम्सीमा बस दुर्घटना हुँदा १४ जना घाईते भएका छन । काठमाण्डौबाट काँकडभिट्टातर्फ जाँदै गरेको बा.प्र.०१–००६ ख ९४२२ नम्बरको बस अनियन्त्रित भई सडकबाट धानवारीमा खसेको हो । घाईतेमध्ये ५ जनाको कटारी अस्पतालमा उपचार भईरहेको छ भने ९ जनाको दुधौली नगर अस्पताल सिर्थौलीमा उपचार भईरहेको जिल्ला प्रहरी कार्यालय सिन्धुलीले जनाएको छ ।
उक्त दुर्घटनामा घाईते हुनेहरुमा काभ्रे धुलिखेल नगरपालिका २ का २३ वर्षिय माधव न्यौपाने, झापाको केरखा गाउँपालिका ३ का ३६ वर्षिय सन्दिप योङखानी, झापाको दमक नगरपालिका ३ का ३६ वर्षिय मुन्ना अधिकारी, मुन्नाको छोरी १९ वर्षिय शुसिला अधिकारी, झापाको दमक नगरपालिका १ का ४८ वर्षिय दिनेश के.सी.खत्री छन । त्यस्तै मोरङको सुन्दरहरैचा गाउँपालिका ८ का लोक बहादुर थापा, इलामको सुर्योदय नगरपालिका १४ की लिला भट्टराई, ललितपुर महालक्ष्मी नगरपालिका ७ का खेम बहादुर बस्नेत, उनकी श्रीमति चन्द्रकला पोखरेल, उनकी चोरीहरु एन्जिला बस्नेत, अनिषा बस्नेत, काठमाण्डौं महानगरपालिका ३ की पबित्रा राई, ताप्लेजुङ सिरिङ्वा गाउँपालिका ६ का गोपाल कडरिया र झापाको बिर्तामोड नगरपालिका २ की संगिता हेमरन घाईते भएका छन ।
यस्तै कमलामाई नगरपालिका वडा नं. २ चियावारी घुम्तिमाथि बि.पि राजमार्गमा इभि र मोटरसाईकल ठोक्किएर दुर्घटना हुँदा २ जना घाईते भएका छन । काठमान्डौबाट लहानतर्फ जाँदै गरेको म.प्र.०१–००१ ज ०२४७ नम्बरको इभी गाडीले वर्दिबासबाट काठमान्डौतर्फ जाँदै गरेको बा.प्र.०२–०३९ प ४५६५ नम्बरको मोटरसाईकललाई ठक्कर दिँदा मोटरसाईकल चालक र मोटरसाईकलमा सवार रहेका अर्का एकजना घाईते भएको प्रहरीले जनाएको छ । मोटरसाईकल चालक सिन्धुपाल्चोक मेलम्ची नगरपालिका १२ का प्रविन तामाङ र सोहि मोटरसाईकलमा सवार ओखलढुङ्गा चम्पादेवी गाउँपालिका ९ का मानध्वज बोगटी घाइते भएको जिल्ला प्रहरी कार्यालय सिन्धुलीका डिएसपी सूर्यप्रकाश सुवेदीले जानकारी दिएका छन ।
यसैबीच विपी राजमार्ग अन्तर्गत सुनकोशी नदीमा डबल क्याप बोलेरो खसेको छ । सोमबार दिउँसो पौने १२ बजेतिर सुनकोशी गाउँपालिका वडा नं. ६ भालुखोलाबाट बोलेरो सुनकोशीमा खसेको डिएसपी सुवेदीले बताए ।
काठमाण्डौबाट गोलञ्जोर गाउँपालिका वडा नं. ४ धाप चौकीतर्फ आउँदै गरेको बा२०च९३१ नम्बरको बोलेरो सुनकोशीमा खस्दा १३ जना घाईते भएका छन । घाईते हुनेहरु सबै गोलन्जोर गाउँपालिका वडा नं. ४ का रहेका छन । घाईते हुनेमा मालती खुलाल, भोज बहादुर थापा मगर, प्रेम मगर, जम्पा खुलाल मगर, सुसन मगर, केदार थापा मगर, रोजिना थापा मगर, ज्ञानेन्द्र मगर, तारा बहादुर खुलाल, नितेश मगर, रोश्मी मगर, ओम आले मगर र गाडी चालक ओम बहादुर राना मगर रहेको डिएसपी सुवेदीले बताए ।
घाईतेहरुको उद्धार गरि खुर्कोटमा रहेको सुनकोशी सामुदायिक अस्पतालमा उपचार भईरहेको छ । इलाका प्रहरी कार्यालय खुर्कोट र शसस्त्र प्रहरी बिपद बेस क्याम्प खुर्कोटको टोलीले घाईतेहरुको उद्धार गरेको थियो ।
